Foto: Qorǵanys mınıstrligi
Is-shara L.N. Gýmılev atyndaǵy Eýrazııa ulttyq ýnıversıtetinde uıymdastyryldy. Oǵan Qorǵanys mınıstrligi basshylyǵynyń ókilderi, QR Qarýly kúshteriniń ardagerleri, Saǵadat Qojahmetulynyń kózin kórgender, batyrdyń esimimen atalatyn elordalyq áskerı kolledjdiń oqytýshylary, stýdentteri, kadetteri jáne «Jas sarbaz» balalar-jasóspirimder áskerı-patrıottyq qozǵalysynyń tárbıelenýshileri qatysty.
Konferensııaǵa qatysýshylarǵa arnalǵan alǵy sózinde L.N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqov konferensııanyń negizgi maqsaty – armııa generaly S.Q. Nurmaǵambetovtyń áskerı murasyn zerdeleý, batyrdyń táýelsiz Qazaqstannyń Qarýly kúshterin qurýǵa jáne ony damytýǵa qosqan úlesin baǵalaý ekenin atap ótti.
«Qazaq dalasy ejelden dańqty batyrlarymen belgili, olardyń esimderi tarıhta da, halyq jadynda da máńgi saqtalǵan. Týǵan halqy úshin ómirin berýge daıyn uldardyń biri, naǵyz Otan qorǵaýshy – Saǵadat Qojahmetuly edi. Biz onyń qaldyrǵan murasyn muqııat saqtap, urpaqqa ónege retinde kóbeıtip, jetkizýimiz kerek», dedi rektor.
Qorǵanys mınıstrligi Tárbıe jáne ıdeologııalyq jumys departamentiniń bastyǵy ádilet polkovnıgi Tileýhan Basqojaev birinshi qorǵanys mınıstrin eske alý týraly vedomstvonyń josparyndaǵy jumys jaıly aıtyp berdi. Ol S. Nurmaǵambetov atyndaǵy Qurlyq áskerleri áskerı ınstıtýtynda batyrdyń 100 jyldyǵyna arnalǵan «Áskerı ant» otandyq serıaly túsirilip, ekranǵa shyqqanyn eske saldy.
Jastarǵa áskerı-patrıottyq tárbıe berýdegi soǵys batyry tulǵasynyń mańyzdylyǵyn EUÝ áskerı kafedrasynyń oqytýshysy zapastaǵy polkovnık Atyǵaı Balǵabekov te atap ótti.
«General Nurmaǵambetov kózi tirisinde óte kishipeıil adam bolǵan, men batyrmyn demegen, baılyq pen ataq-dańqqa umtylmaǵan. Jeke basynyń qasıetteri, ustanǵan moraldyq qaǵıdattary, qıyndyqqa toly ómir joly óskeleń urpaqqa úlgi bolýǵa tıis», dep tolyqtyrdy A. Balǵabekov.
EUÝ áskerı kafedrasynyń oqytýshysy Ábýbákir Smaıylov Saǵadat Nurmaǵambetov sııaqty adamdar júz jylda bir ret týylatynyn atap ótti.
«О́ziniń eli úshin eki ret erlik jasaǵan uly tulǵa. Alǵash ret 19 jasynda Otan qorǵaýǵa attanyp, nebári 20 jasynda Keńes Odaǵynyń Batyry ataǵyn aldy, ekinshi ret Táýelsiz Qazaqstan armııasyn qurýǵa ólsheýsiz eńbek etti. 2005 jyly BUU Bas Assambleıasynyń 60 jyldyǵyna arnalǵan otyrysta Saǵadat Nurmaǵambetov álemdik trıbýnadan sóz sóılegen jalǵyz maıdanger boldy. Bul biregeı tarıhı kadrlar bizge BUU-nyń muraǵatynan aldyq. Armııa generalynyń osy baǵa jetpes kadrlarda aıtqanynyń bári búgingi kúnge deıin ózekti. Jas urpaq ata-babalarymyzdyń eń qundy murasy – jerimizdegi beıbitshilikti saqtaýy tıis», dep atap ótti Ábýbákir Smaıylov.
General-leıtenant Abaı Tasbolatov taSaǵadat Nurmaǵambetov týraly estelikterin bólisti.
«Men úshin ákemdeı boldy. Biz ol kisini úlgi etip óstik. Kóp nárseni úıretti. Kadrlardy qalaı tańdaý kerektigin jaqsy biletin. О́mirdiń barlyq qıyndyqtaryna qaramastan, ol synǵan joq, qaıta rýhy kúsheıe tústi. Synǵa shyńdala túsetin, naǵyz kúresker adam edi. Bizge de qıyndyqqa moıymaýdy úıretti. Endigi jerde bizdiń mindetimiz – keler urpaqty elin, jerin qasterleýge tárbıeleý», dedi ardager.
Konferensııa barysynda batyrdyń nemeresi Lıra Nurmaǵambetovanyń estelikteri de aıtyldy. Onyń aıtýynsha, Saǵadat Qojahmetuly óte qarapaıym, biraq talapshyl jáne jaýapty adam bolǵan. Este saqtaý qabiletiniń myqtylyǵy sondaı ol ómirindegi kóptegen oqıǵalardy búge-shigesine aıta alatyn. Batyr Otanǵa jáne halyqqa adal ári janqııarlyq qyzmetimen úlgi bolyp, máńgi el jadynda saqtalary sózsiz.
