Kórnekti memleket qaıratkeri, aǵartýshy, ádebıetshi Smaǵul Sádýaqasuly 1919 jyly Omby qalasynda shyǵatyn «Trýdovaıa Sıbır» jýrnalynda jarııalanǵan «Kırgızskaıa lıteratýra» degen ocherkinde qazaq ádebıetiniń jaǵdaıy, onyń órkendeýi jóninde taldaý jasaǵan.
«Aqyndardyń ishinde halyqshyl aqyn S.Dónentaev aıryqsha daralanady. Onyń óleńderiniń rýhy taza qazaqsha, ulttyq arqaýy aıryqsha berik, shýmaqtarynyń júıeliligi, býnaqtarynyń úndiligi jóninen, tereń mazmuny jóninen, eń aqyry keremet ótkirligi jóninen Dónentaev óleńderi halyq poezııasynyń atasy Baıtursynuly pen názik jandy lırık Jumabaevtyń shyǵarmalaryna jeteǵabyl», dep jazdy. Budan baıqaıtynymyz, S.Dónentaev – óz zamanynda-aq naqty baǵasyn alǵan aqyn. Al tulǵanyń qazaq ádebıetiniń damýyna qosqan úlesi qomaqty.
Sábıttiń baspasózben baılanysy, ıaǵnı jýrnalıstik qyzmeti 1912 jyly Pavlodardaǵy Qasym Ertisbaevtyń medresesinde oqyp júrgen kezinen bastalǵan. Semeıdegi muǵalimder daıarlaıtyn kýrsta oqı júrip, «Saryarqa» gazeti men «Abaı» jýrnalyna óleńderin joldap otyrady. Keıin «Qazaq tili men ádebıeti», «Sosıalıstik Shyǵys», «Jańa aýyl», «Qazaq tili» gazetterinde tilshi, bólim meńgerýshisi bolyp qyzmet atqarady. Semeıdegi jýrnalıstik qyzmetinde ol jergilikti dramatýrgtermen, sonyń ishinde Jumat Shanınmen baılanys ornatyp, pesalardy talqylaýǵa aralasqan. Aqyn dramatýrgııany óte qıyn janr dep eseptegen.
Buqar jyraý mýzeıinde saqtalyp turǵan sııasaýytty kezinde Semeıdegi «Jańa aýyl» (qazirgi «Semeı tańy») gazetiniń redaksııasy aqynǵa syıǵa tartqan. Atalǵan basylym 1928-1930 jyldar aralyǵynda shyǵyp turǵan. Sııasaýyttyń astyńǵy jaǵynda latyn áripterimen «S.Dónentaıulyna «Jańa aýyldan» berilgen belgi» dep jazylǵan.
Jádigerdi kezinde tulǵanyń qyzy Sáýlet Sábıtqyzy ákesiniń týǵan jerine arnaıy ákelip, mýzeıge tabys etken eken.
Pavlodar oblysy
