«Alatau Hub» eldegi basqa da óńirlik ınnovasııalyq ortalyqtar sııaqty, «Astana Hub» bilim berý jáne ınkýbasııalyq baǵdarlamalaryn taratyp, mıtaptar, «Pizza Pitch» , vorkshoptar, «Speaker Talks», «Idea Battle», t.b. sııaqty túrli is-sharalardy ótkizýge arnalǵan basty alańǵa aınalady. Bul oqıǵalar salada IT-qaýymdastyqtyń qalyptasýy men damýyna, sondaı-aq bilim men tájirıbe almasýǵa yqpal etedi. Habtyń ashylýy aıasynda elimizdiń iri IT-kompanııalarynyń kórmesi uıymdastyryldy.
«IT-habty ashý – tehnologııalyq ınfraqurylymdy damytýdaǵy, óńirdegi ınnovasııalyq ıdeıalardy qoldaýdaǵy mańyzdy qadam. «Alatau Hub» Almaty oblysynyń IT-qoǵamdastyǵyn damytýda jańa standarttardy belgileıdi. Onyń maqsaty – tehnologııalyq kásipkerlikti nasıhattaý, startap-mádenıetti qalyptastyrý, óńirde IT-salany, sıfrlyq bilim berýdi damytý», dedi Almaty oblysy ákimi apparatynyń basshysy Murat Madıgýlov.
Bul «Astana Hub» basqarýymen iske qosylǵan 14-óńirlik hab. Negizgi maqsat – osy jyldyń sońyna deıin elimizdiń barlyq óńirlerin qamtý.
«Bizdiń aımaqtyq habtar ınnovasııaǵa, kásipkerlikke, tehnologııalyq úderiske yqpal etetin ekojúıeni qurýda, qoldaýda sheshýshi ról atqarady. Jastar tek oqýǵa ǵana emes, sonymen qatar óz bilimin is júzinde qoldanýǵa, kompanııalary men ınnovasııalyq ónimderin qurýǵa múmkindik alady. Bul jańa jumys ornynyń paıda bolýyna, ekonomıkanyń ósýine, halyqaralyq arenada eldiń básekege qabilettiliginiń artýyna yqpal etedi», dedi «Astana Hub» basqarýshy dırektory Danııa Ahmetova.
