Kelýshilerge tárbıe jumysyn uıymdastyrý men áskerı tártipti saqtaý boıynsha qorǵanys vedomstvosy tarapynan qabyldanyp jatqan sharalar týraly jan-jaqty aqparat berildi. Sonymen qatar qarý qoldaný, sabaqtar men jattyǵýlar ótkizý kezindegi qaýipsizdik qalaı qamtamasyz etiletini egjeı-tegjeıli túsindirildi. Qonaqtar kazarmalardy aralap, jatyn bólmeler men turmystyq aımaqtardy kórdi.
Eń mańyzdy sáttiń biri – ashyq esik kúnine kelgen sarbaz týystary ashana mázirimen tanysyp qana qoımaı, sol jerden dám tatyp, birge túski as ishýi boldy. Máni aıryqsha bul kezdesý ata-analarǵa erekshe áser etti.
Áskerı bólimderde bolǵan jas qonaqtardy da erekshe atap ótken jón. Taraz qalasynan kelgen on jasar Alena «Ońtústik» óńirlik qolbasshylyǵyna qarasty baılanys polkinde qyzmet etetin aǵasy Vladımır Romanovty kórip, máz-maıram boldy. Áskerı bólimge jasalǵan bul sapar mektep oqýshysyna zor áser qaldyryp, aǵasyna degen maqtanysh sezimin oıatqany sózsiz.
Gvardeısk garnızonyndaǵy tank brıgadasynyń barlaý batalonynda qyzmet etetin Aıbar Kalıfanovtyń úsh jasar inisi Ámire aǵasynyń qolynan túsken joq. Urpaqtan urpaqqa jalǵasatyn áskerı dástúr dál osylaı qalyptassa kerek.
Elordadaǵy brıgadadaǵa Qaraǵandy, Shymkent, Qyzylorda, Qostanaı jáne Astana qalalarynan 170-ten astam ata-ana jınaldy. Olar tırdi, sport zalyn, kitaphanany aralap, jaýyngerler jattyǵatyn taktıkalyq alańdy kórip, tanysyp shyqty. Qatardaǵy jaýynger Dıas Bazkenovtiń ákesi Ashat pen onyń týǵan aǵasy Sábıt Bazkenov Qaraǵandy qalasynan arnaıy kelgen. Jaýyngerlik jarystyń jeńimpazy atanǵan Dıas Bazkenovtiń sýreti bólimsheniń qurmet taqtasyna ilingen.
Sábıt Bazkenovtiń ózi kezinde tájik-aýǵan shekarasynda áskerı boryshyn ótegen. Ol qazirgi áskerdiń jaǵdaıyn kórip, erekshe áser alǵanyn aıtty.
«Biz tájik-aýǵan shekarasynda qyzmet atqarǵanda, ol kezdiń qıyndyǵy az bolǵan joq. Búgingi jastardyń áskerı boryshyn abyroımen ótep júrgenin kórip, kóńilim marqaıdy. Dıas sııaqty tártipti, namysty uldar eldiń qorǵany bolary sózsiz. Jastarǵa aıtarym – Otan aldyndaǵy boryshty adal ótep, áskerı tártipke árdaıym berik bolsyn», dedi ol.
Aqtaý garnızonynyń áskerı bólimderi 400-den astam qonaqty qabyldady. Áskerı-teńiz kúshteriniń ártekti kemeler dıvızıonynda ata-analar teńiz qyzmetiniń atmosferasyna qanyqty. Olar matrostardyń turmysymen tanysyp, kaıýt-kompanııalar men kambýzdy aralady.
Teńiz jaıaý áskerleri brıgadasynda ata-analardyń qatysýymen sporttyq jarystar ótti. Mańǵystaý oblysy men Aqtaý qalasy boıynsha «Analar júregi» sarbaz analary komıtetiniń tóraıymy Gúlmıra Janysbaeva jarystyń bastamashysy boldy.
Desanttyq-shabýyldaý áskerleriniń bólimsheleri de 400-den astam qonaqty qarsy aldy. 37-desanttyq-shabýyldaý brıgadasynda qonaqtarǵa parashıýtti qalaı kııý kerektigi kórsetilip, arnaıy keshende áýe-desanttyq daıyndyq elementteri tanystyryldy.
