foto: gov.kz
«Prezıdent Ulttyq quryltaıda jastardyń shyǵarmashylyq salaǵa belsendi aralasýyn atap ótip, kıno, óner jáne mádenı ónim óndirýdiń jańa formattary ulttyq biregeılikti qalyptastyrýdyń jáne otandyq mádenıetti halyqaralyq deńgeıde ilgeriletýdiń mańyzdy tetigine aınalyp otyrǵanyn aıtty. Bul – kreatıvti ındýstrııanyń qosalqy sala emes, jańa jumys oryndaryn qalyptastyratyn, jańa mamandyqtardy naryqqa ákeletin jáne eksporttyq áleýetke ıe tolyqqandy ekonomıkalyq sektor retinde qalyptasyp kele jatqanyn kórsetedi», dedi «Jastar» ǵylymı-zertteý ortalyǵynyń dırektory Gúlishan Nahbaeva.
Sondaı-aq ol búgingi jas azamattardyń zamanǵa saı, ózindik bolmysy qalyptasyp kele jatqanyn aıtady.
«Bizdiń áleýmettaný salasyndaǵy zertteýlerimizden ańǵarǵanymyz, el jastarynyń ekonomıkalyq minez-qulqynyń jańa modeli qalyptasyp keledi. Bul modelde turaqty tabysqa umtylý, eńbek ıkemdiligine qyzyǵýshylyq jáne qundylyqtar, biregeılik pen eńbektiń maǵynalyq mazmuny sııaqty materıaldyq emes faktorlardyń róli arta túsken. Demek, jastar eńbegin tek jumyspen qamtý uǵymy aıasynda ǵana emes, ekonomıkalyq belsendilik, shyǵarmashylyq áleýet, sıfrlyq quzyretter men áleýmettik jaýapkershiliktiń birtutas júıesi retinde qarastyrý qajet. Mádenıet, kreatıvti ekonomıka jáne jańa mamandyqtar salasyndaǵy jastar bastamalaryn qoldaý elimizdiń ornyqty damýy men bolashaq ekonomıkasyn qalyptastyrýdyń mańyzdy sharty», dedi G.Nahbaeva.
Byltyrǵy esep boıynsha respýblıkadaǵy kreatıvti sektorlarda 143 600 adam jumys isteıdi. Eńbek resýrsyn qajet etetin baǵyttar qatarynda IT, sáýlet óneri men sán ındýstrııasy, mádenı-demalys mekemeleri, kitaphanalar men mýzeıler, halyqtyq qolóner kiredi.
Prezıdent: Jastardyń jańashyldyǵy kez kelgen salaǵa zor serpin beredi
Búginde Astana, Almaty, Túrkistan, Shymkent, Atyraý, Qyzylorda, Petropavl, Aqtóbe, Semeı, О́skemen, Aqtaý jáne Jezqazǵan qalasynda 12 hab jumys istep jatyr.
Mańyzdysy, bıyl elimizde kreatıvti ındýstrııa sýbektterin memlekettik qoldaý jáne yntalandyrý qaǵıdalary bekitildi. Jańa qujat salany damytýdyń júıeli ári ashyq tásilin qalyptastyryp, kreatıvti jobalardyń ıdeıa men pılottyq sheshimderden bastap, halyqaralyq naryqtarǵa shyǵý jáne kommersııalandyrýǵa deıingi kezeńin tolyq qamtıdy.
Munda qarjyny qaıtarý máselesine erekshe nazar aýdarylǵan. Kreatıvti jáne pılottyq jobalardy qarjylandyrý, birlese qarjylandyrýǵa arnalǵan quraldar, jeke ınvestorlarmen bastamalardy iske asyrý, kreatıvti ónim eksportyn qoldaý, zııatkerlik menshikti tirkeý jáne quqyqtyq qorǵaýǵa jumsalǵan shyǵyndardy óteý, halyqaralyq shyǵarmashylyq baıqaýlar men is-sharalarǵa qatysý, sondaı-aq halyqaralyq deńgeıdegi jetistikter úshin syıaqy berý máseleleri de qarastyrylǵan.
Sonymen qatar qarjylyq emes qoldaý sharalary da qarastyrylǵan. Máselen, konsýltasııalyq, akselerasııalyq, bilim berý boıynsha qoldaý, halyqaralyq mádenı, kreatıvti platformalarǵa qatysýǵa járdemdesý, úı-jaılar men jabdyqtardy jeńildetilgen sharttarmen usyný, sıfrlyq servıster men onlaın-platformalardy damytý, jobalarǵa marketıngtik jáne quqyqtyq jetekshilik etý, kreatıvti ındýstrııany damytýdyń óńirlik strategııalaryn ázirleý, ınklıýzııany qamtamasyz etý sharalary, salanyń jekelegen baǵyttary boıynsha arnaıy baǵdarlamalar kiristirilgen.
