О́tken jyly tamyz aıynyń 28-inde Jánibek aýdanynda oqys oqıǵa bolǵan edi. Aýdan ortalyǵynan Uzynkól aýlyna bet alǵan balaly áıeldi kólik eldi mekenniń janynan túsirip kete barǵan. Kún keshkirip, kóz baılana bastaǵan shaq eken. Anasy sońynan erip kele jatqan úsh jasar qyzy Aıarýdyń ózinen qalyp qoıǵanyn qapelimde baıqamapty. Keıin aınala júgirip izdegenimen, taba almaǵan. Janushyrǵan kelinshek amalsyz polısııaǵa habarlaǵan.
Árıne, oqıǵa ornyna polısııa qyzmetkerleri jedel jetti. Bolǵan jaǵdaıdan aýyl halqy da habardar boldy. Iske tótenshe jaǵdaılar bólimi, shekara qyzmeti, jergilikti ákimdik túgel jumyldy. 200-den asa adam tún ishinde qarshadaı qyzdy izdeýge kiristi.
– Túngi saǵat 12-ler shamasynda maǵan habar keldi. Tez arada «Roıter» atty ıtimdi alyp, Uzynkólge jettim. Aıarýdyń kıiminiń ıisin alǵan soń-aq ıtim aýyldan alysqa tarta berdi. Osylaısha, 5-6 shaqyrymdaı uzap shyqtyq. Janymdaǵy serikterimniń bárinen alystap, jalǵyz kettim. Sóıtip kele jatyp, búrisip otyrǵan qyzdyń ústinen tústik. Sol kúni tún salqyn bolatyn. Aıarýdyń qoldary qyzaryp ketipti. О́zi ábden qorqyp qalǵan. Birden jyly kıim jaýyp, qushaǵyma qysyp alyp, aýylǵa júgirdim, – deıdi sol kúngi oqıǵany esine alǵan «Qaırat» shekara bólimshesiniń aǵa serjanty Rafhat Taıkenjın.
Kishkentaı qyz anasyn kórgende ǵana óz-ózine kelipti. Tańǵalatyn jaǵdaı – Aıarý aýyl mańynda sý júretin tereń arnanyń dál janyna kelip toqtaǵan eken. Perishtesi qaqty degen osy shyǵar. Áıtpese tas qarańǵy túnde sýǵa qulap ketse, shynashaqtaı qyzdyń aman qalýy ekitalaı edi. Abyroı bolǵanda, bir aýyldy aıaǵynan tik turǵyzǵan oqıǵa tańǵy saǵat 4-te qýanyshpen aıaqtaldy.
Aǵa serjant R.Taıkenjın shekara qyzmetinde eńbek etip júr. Otan aldyndaǵy boryshyn Almaty qalasyndaǵy 5572 áskerı bólimde ótegen Rafhat Maqashuly 2012 jyly qyrkúıek aıynan bastap Shekara qyzmetiniń Jánibek aýdany basqarmasyna jumysqa turǵan. Al 2016 jyldan beri qyzmettik ıtterdi baýlýǵa kirisipti. Búginde aǵa nusqaýshy laýazymynda júrgen shekarashy Aıarýdy ajaldan qutqarǵan eńbegin solaı bolýǵa tıis qalypty oqıǵa dep sanaıdy.
– Qyzmet barysynda halyqqa kómektesý – bizdiń paryzymyz, áskerı boryshymyz. Qazaqstan Respýblıkasyna árdaıym qyzmet etemin! – deıdi R.Taıkenjın.
Batys Qazaqstan oblysy
