Kollajdy jasaǵan – Qonysbaı ShEJIMBAI, «EQ»
Al keshe «Qazaqstan halqyna» qory, «Qazaqmys» korporasııasy jáne Soltústik Qazaqstan oblysynyń ákimdigi taǵy 100 úı turǵyzý jónindegi memorandýmǵa qol qoıdy. Bul qujat Soltústik Qazaqstan oblysy ákimdigi usynǵan tıptik joba boıynsha Petropavl qalasynyń «Solnechnyı-2» shaǵyn aýdanynda taǵy 100 turǵyn úıdi salýdy qamtyǵan. Osy úıler qurylysynyń shyǵynyn «Qazaqmys» korporasııasy kóterip, 100 úıdiń qurylysy aıaqtalǵannan keıin merdigerlerge tóleýge «Qazaqstan halqyna» qoryna qaıyrymdylyq kómek retinde 2,4 mlrd teńge aýdaratyn bolyp kelisildi.
Sý tasqynynan zardap shekken otbasylaryn tez arada baspanamen qamtamasyz etý maqsatymen úsh jaqty qujatta taraptardyń mindetteri men fýnksııalary aıqyndalǵan. «Qazaqmys» korporasııasy» JShS-nyń turaqty damý jónindegi dırektory Sáken Shaıahmetov bul shyǵyndar kompanııanyń bıznes pen memlekettiń áriptestigin iske asyrýdyń naqty rámizine aınalatynyn atap ótti. «Qazaqstan halqyna» qoǵamdyq qorynyń basqarma tóraǵasy Bolat Jámishev barlyq jumystyń ashyqtyǵy, sonymen qatar qurylys sapasynyń joǵary bolýy qoǵamdyq baqylaýdyń qatysýymen ǵana iske asyrylatynyn eskertti. Soltústik Qazaqstan oblysynyń ákimi Ǵaýez Nurmuhambetov zardap shekkenderge qoldaý kórsetkeni úshin áriptesterine alǵysyn bildirip, apattyń saldaryn sátti eńserý úshin eldiń barlyq kúsh-jigerin bir arnaǵa toptastyra bilgen Úkimetke de rızashylyǵyn aıtty.
Jergilikti atqarýshy organdar tapsyrys berýshi retinde zardap shekkenderdiń shyǵynyn baǵalaýǵa, jańa qurylystardyń smetalyq esepterin daıyndaýǵa, jer telimderin bólýge, jobalyq-smetalyq qujattamany kelisýge, táýelsiz saraptamalyq (baǵalaýshy) kompanııalar men qoǵamdyq uıymdardy tarta otyryp, merdigerlerdi tańdap, bar aqparatty jáne qajetti qujattardy mezgilimen usynyp otyr. Jańa baspana alatyndarǵa ózderiniń sharýasyn damytýǵa nesıe alý múmkindigi de jeńildetilgen.
Sonymen, «Solnechnyı-2» shaǵyn aýdanynda burynǵy 100 úıge qosa «Qazaqmys» korporasııasynyń qoldaýymen salynatyn baspanalar qosylyp, 200 úıdi turǵyzatyn qarajattyń máselesi sheshildi. Alǵashqy 100 úıdiń qurylysy merdigerler maýsym aıynda aıaqtalatynyn aıtty. «Qazaqstan halqyna» qorynyń tóraǵasy salynyp jatqan úılerge baryp, qurylys barysymen tanysty.
«Myna joba óte jaqsy, sapaly ári keń ekeni kórinip tur. Árbir úıdiń kólemi 80 sharshy metrden eken. Irgetasy myqty, astynan jel saýlamas úshin topyraq úıilip, nyǵyzdalǵan. Tóbesi tórt qatar materıaldarmen jabylǵan. Úıge aýyzsý tartylǵan, shaıyndy sýlar qalalyq kárizge qosylady eken. Menińshe, mundaı úılerge turǵyndar rıza bolýǵa tıisti», dedi B.Jámishev.
Osy «Solnechnyı-2» shaǵyn aýdanynda bekitilgen úsh joba boıynsha barlyǵy 500 úı salynbaq. Bul maqsatta qurylys jerleri bólingen. Qalǵan 300 úıdiń máselesimen jýyrda oblys ákimi Ǵ.Nurmuhambetov Astanadaǵy iri paneldi baspanany salýǵa mamandanǵan «Úı qurylysy kombınaty GLB» zaýytynyń basshylyǵymen kezdesti. Olardyń kómegimen «Kaspi» AQ qarajatyna «Solnechnyı-2» shaǵyn aýdanynda taǵy da 300 turǵyn úı salynady. Sóıtip, 500 úıdiń qurylysy bıylǵy jaz boıy júrip, kúzde úılerdi jóndeýge jaramsyz bolǵandar arasynan zardap shekken turǵyndardyń osynsha otbasy jańa qonys toıyn jasamaq.
Aıta ketetin jaıt, oblys ortalyǵynyń turǵyndary sorǵy stansasyn tasqyn buzyp, isten shyǵarǵannan beri úıge keletin sýdy qalanyń túbindegi kólden tartylǵan qubyrdan alyp otyrǵan. Kóldiń sýy tazalanyp berilgenimen aǵyn sýdaı emes dámsiz bolǵandyqtan halyq aýyzsýdy dúkenderden satyp alyp, iship otyrǵan. Jýyrda sorǵy stansasy jóndelip, aýyzsý Esilden alynatynyn «Qyzyljar sý» kompanııasy jarııalap, halyqty qýantyp tastady.
Alaıda bári de maıdan qyl sýyrǵandaı jymdasyp jatqan joq. Sýdyń astynda qalǵan keıbir jaqsy úılerdiń shyǵynyn baǵalaýshylar «baıdyń asyn baıǵus qyzǵanady» degendeı arzan baǵalap, olardyń kórsetken somasy úıdi qalpyna keltirýge jetpeıtin bolǵan soń narazylyq bildirýshiler de shyǵyp jatyr.
Soltústik Qazaqstan oblysy
