Kólik qurastyrý ortalyǵynyń dánekerleý, syrlaý jáne avtokólik qurastyrý sehy bar. Tájirıbe ortalyǵyn qajetti zamanaýı qurylǵylarmen jabdyqtaýǵa «Allur» zaýyty 140 mln teńge qarjy jumsaǵan. Jalpy, sońǵy jyldary avtokólik óndirisi qarqyndy damı bastaǵan Qostanaı oblysynda atalǵan salaǵa bilikti kadrlardy daıarlaý máselesi birinshi kezekte tur. Jylyna myńdaǵan avtokólik shyǵaryp jatqan iri kásiporynnyń tehnıka mamandaryn daıarlaıtyn oqý mekemesine birinshi ret qomaqty qarjy salýy da osy máseleni sheshý maqsatynda bolyp jatqan jaǵdaı.
«Buǵan deıin stýdentter usaq bólshekti mashına qurastyrý óndirisimen tek oqý tájirıbesine barǵanda ǵana tanysa alatyn. Endi oqýdan qol úzbeı-aq, osy kolledjdiń ǵımaratynda júrip tájirıbelik daǵdylaryn qalyptastyrýǵa múmkindik alyp otyr. Buǵan deıin elimizdiń eshbir bilim mekemesinde mundaı ortalyq bolǵan emes. Qostanaı avtokólik transporty kolledjin támamdaǵan túlekter endi bizge daıyn maman bolyp keledi. Kolledj stýdentteri de oqýyn aıaqtaǵan soń birden jumysqa ornalasa alady», deıdi «Allur» zaýyty óndiristik oqytý bóliminiń basshysy Mahabbat Ermaǵanbetova.
Arnaıy kásipik bilim beretin oqý ornyndaǵy kólik qurastyrý alańy «Allur» kásibı quzyrettilik ortalyǵy» dep atalady. Kolledj ben avtokólik zaýytynyń arasynda tyǵyz baılanys ornaǵaly beri oqý ornyndaǵy bilim sapasyn arttyrý baǵytynda da birtalaı sharýa atqarylǵan.
«Zaýyt bizdiń kolledjdi 2021 jyldan beri qanatynyń astyna alyp, jan-jaqty qoldaý kórsetip keledi. Sondyqtan mundaǵy oqý úderisi avtomobıl jasaý salasyndaǵy óndiristik tehnologııamen tyǵyz baılanysta órbıdi. Osynyń nátıjesinde, bizde sapaly tehnıkalyq mamandardy daıarlaýǵa qajetti jaǵdaıdyń bári bar. Máselen, 2023 jyly kolledj «Mashına jasaý» mamandyǵy boıynsha lısenzııa aldy. Quzyrettilik ortalyǵynda biz balalardy osy baǵytta oqytyp, úıretip, kásipke baýlımyz. Munda kirgen stýdent kádimgi zaýytqa kirgendeı áserde bolady. О́ıtkeni bul ortalyqta avtomobıl zaýytynda bar qurylǵynyń bári bar. Zaýyttyń shaǵyn kóshirmesi desek te bolady. Osy jerde tájirıbe alǵan túlekter keıin kásiporynǵa barǵanda kásipke tez tóseledi», deıdi Qostanaı avtomobıl transporty kolledjiniń dırektory Dmıtrıı Pavlenko.
Stýdentterdiń tájirıbesin zaýyttyń bilikti mamandary men kolledj oqytýshylary ushtaıtyn bolady. Jańa ortalyqqa ornatylǵan dánekerleý, boıaý apparattary men qurastyrý jelisi, júk kótergish tárizdi qurylǵylardyń bári – dál «Allur» zaýytyndaǵydaı.
«Biz qurylǵylardyń bárin iske qosyp kórip, tekserip shyqtyq. Aldaǵy oqý jyly 3-kýrs stýdentterin osy jerde oqytatyn bolamyz. Zaýytqa jańa ornalasqan jas mamandar da osy jerde alǵashqy tájirıbeden ótetin bolady. О́ıtkeni munda eńbek qaýipsizdigine qatysty máseleniń bári jan-jaqty qarastyrylǵan. Taǵylymdamadan ótýshiler qaýipsiz jaǵdaıda óndiris álipbıimen tanysyp, tájirıbe alyp shyǵady. Osy jerden shyqqan stýdentter men úırenýshilerdiń bári zaýytqa jumysqa alynady», deıdi «Allur» kásibı quzyrettilik ortalyǵynyń bastyǵy Denıs Nagovısyn.
Mamandardyń aıtýynsha, jańa joba elimizdiń avtomobıl jasaý salasy boıynsha sapaly mamandardy daıarlaýdyń tolyqqandy júıesin qalyptastyrady.
Qostanaı oblysy
