Foto: senate.parlam.kz
Senatordyń jazýynsha, atalǵan mańyzdy Zańnyń negizgi tustary mynalar:
- kámeletke tolmaǵandardyń jynystyq tıispeýshiligine qarsy qylmystar úshin sottalǵan sheteldikterge Qazaqstan Respýblıkasyna kirýdi jáne eldiń azamattyǵyn alýdy shekteý;
- ekstremıstik nemese terrorıstik áreketterge qatystylyǵy bar sheteldikterdiń elge kirýine tyıym salý;
- kóshi-qon salasyndaǵy zańnamanyń saqtalýyna memlekettik baqylaýdy júzege asyrý tártibin aıqyndaý;
- eger jeke basyn kýálandyratyn qujattardy jáne qoldanylý merzimi ótken basqa qujattardy uzartý nemese aýystyrý múmkindigi bolmasa, olardy tótenshe jaǵdaılarda paıdalaný máselesin retteý. Mundaı qujattar qoldanylý merzimine qaramastan jaramdy dep tanylady;
- qos azamattyqty bolǵyzbaý maqsatynda Qazaqstan azamattyǵyn alǵannan keıin basqa memlekettiń azamattyǵyn rastaıtyn qujattardy paıdalanǵan jaǵdaıda QR-nyń azamattyǵyn joǵaltýdyń jańa negizi engizildi.
«Sonymen birge Zańda QR-nyń Úkimeti aıqyndaǵan óńirlerge qonys aýdarýshylar úshin aýyl sharýashylyǵy maqsatyndaǵy jer ýchaskelerin alýǵa jaǵdaı jasaýǵa baǵyttalǵan túzetýler usynyldy. Osy Zańǵa sáıkes, qonys aýdarýshylarǵa Úkimet aıqyndaǵan óńirlerde sharýa nemese fermer qojalyǵyn júrgizý úshin jer ýchaskeleri konkýrstan tys tártippen 5 jylǵa deıingi merzimge ýaqytsha qysqa merzimdi aqyly jer paıdalaný (jalǵa alý) quqyǵymen beriletin bolady», dep jazdy Senat depýtaty.
Amangeldi Tolamısovtyń sózinshe, erikti qonys aýdarǵan adamdarǵa jáne olardyń otbasy múshelerine bıýdjet qarajaty esebinen kóshýge, turǵyn úıdi jaldaýǵa jáne kommýnaldyq qyzmetterdi tóleýge, turǵyn úıdi satyp alýǵa tólenetin sýbsıdııalardy bankter men basqa da qarjy uıymdary aldyndaǵy kredıttik mindettemeleri boıynsha óndirip alýdan qorǵaýǵa baǵyttalǵan normalar bekitiledi. Atap aıtqanda, atalǵan materıaldyq kómekti paıdalanýda tyıym salynbaıdy jáne ózge de shekteýler qoıylmaıdy.
«Zańmen qandas mártebesin jáne Qazaqstan azamattyǵyn jeńildetilgen tártippen alýǵa úmitkerlerdiń jeke basyn kýálandyratyn nemese ultyn rastaıtyn basqa da qujattarda tıisti jazba bolmaǵan jaǵdaılarda, ony aıqyndaý rásimin jetildirýge baǵyttalǵan túzetýler usynylady. Atap aıtqanda, Eńbek jáne halyqty áleýmettik qorǵaý mınıstrligine ulty qazaq ekenin aıqyndaý erejesin ázirleý jáne bekitý jónindegi ókilettigi bekitiledi. Osy másele boıynsha sheshimdi jergilikti atqarýshy organ ulty qazaq ekeni týraly máselelerdi qaraý jónindegi komıssııa qurý arqyly qabyldaıdy», dep jazdy A.Tolamısov.
Sondaı-aq Senat depýtaty atalǵan mańyzdy Zańda qylmystyq-atqarý júıesi mekemelerinde beınebaqylaý júıesiniń komponentin qasaqana joıǵany nemese búldirgeni úshin qylmystyq jaýaptylyq engiziletinin atap ótken.
«Qorytyndylaı kele, bul Zań ulttyq jáne qoǵamdyq qaýipsizdik máselelerin qamtamasyz etýge, kóshi-qon salasyndaǵy memlekettik retteýdiń tıimdiligin arttyrýǵa, tıimdi kóshi-qon baqylaýyn qamtamasyz etýge, qonys aýdarýshylarǵa memlekettik qoldaý kórsetýge baǵyttalǵan», dep túıindedi senator.
