Oblys ákimi Qumar Aqsaqalov jańa qonys ıelerimen kezdesti.
«Memleket basshysynyń tapsyrmasy boıynsha barlyq zardap shekkenderge jan – jaqty kómek kórsetiledi», dedi oblys ákimi Qumar Aqsaqalov. – « Memleket bar jaǵdaıdy jasap, shyǵyndardy óteý, áleýmettik tólem jasaý, buzylǵan úılerdi qalpyna keltirý, jańasyn turǵyzý ispetti jumystardy atqaratyn bolady.
Budan basqa, Qostanaı aýdanynyń zardap shekken turǵyndarynyń zaqymdanǵan múlik shyǵyny ótelip, áleýmettik kómek túrindegi ótemaqy berildi. Tólemderdiń jalpy somasy 191,3 mln teńge.
Qalpyna keltirýge jatatyn barlyq úılerde jóndeý jumystary júrip jatyr, jóndeý jumystary osy jyldyń 15 maýsymyna deıin aıaqtalýy tıis.
Budan basqa, «Qazaqstan Halqyna» qoǵamdyq qorynyń qarajaty esebinen oblystyń Qostanaı, Amangeldi jáne Jangeldın aýdandarynda 88 jeke turǵyn úıdiń qurylysy bastaldy.
BAZIS-A kompanııasy Arqalyq qalasynda 50 páterli turǵyn úıdiń qurylysyn bastady. Páterler Arqalyq qalasynyń, Amangeldi jáne Jangeldın aýdandarynyń zardap shekken turǵyndaryna beriledi.
Sondaı-aq zardap shekken turǵyndar úshin Qostanaı qalasynyń Qonaı shaǵyn aýdanynda 15 úı salý josparlanǵan, onyń 8-i bastaldy.
Memleket shyǵyndy óteýdiń eki ádisin: jańa úı salý nemese naryqta daıyn páter satyp alýdy usynady.
Zalaldy baǵalaý jónindegi komıssııanyń málimetinshe, Qostanaı oblysynda 475 úı qalpyna keltirýge jatpaıdy. Qazirgi ýaqytta 208 turǵyn jańa baspanamen qamtamasyz etilgen, bul zardap shekkenderdiń 43,7% quraıdy. Páterler turǵyndardyń menshigine beriledi.
