45 myń oqýshy lagerde demalady

32 myńnan astam túlek ózderi tańdaǵan mamandyqty meńgerý maqsatynda bilimin jalǵastyrady. Árbir jastyń tańdaǵan mamandyǵyn jan-jaqty zerttep, ata-anasymen keńese sheshim qabyldaǵany anyq. Osy oraıda búginde oblys kólemin­de 245 beıindi dárigerge tapshylyq bar ekenin aıta ketelik. Onyń 100-ge jýyǵy qurylysy aıaqtalýǵa jaqyn 570 tósek-oryndyq oblystyq kóp­beıindi aýrýhanaǵa qajet. Ási­rese anestezıolog-reanımatolog, neo­­­na­tolog, akýsher-gınekolog, angıohırýrg, onkolog, patologoanatom, radıolog, travmatolog, reabılıtolog, endokrınolog, dermotolog, ChLH, gematolog, gastroenterolog, taǵy basqa da mamandarǵa suranys bar. Oblys aýmaǵyndaǵy dárigerlerge degen tapshylyqty joıý maqsatynda birqatar joba júzege asyrylyp ta keledi. О́tken jyly 43 dáriger shetelde biliktiligin arttyrdy. О́ńirdegi tapshy mamandyqtaǵy dárigerlerdi tartý maqsatynda jergilikti bıýdjet qarajaty esebinen rezıdentýrada medısınalyq kadrlardy daıarlaýǵa memlekettik bilim berý tapsyrysyna jyl sa­ıyn grant bólinip otyr. Byltyr 60 grant bólinip, 40 úmitker ótinim bildirgen. Qazirgi tańda 37 úmitker medısına salasy boıynsha bilimin jetildirip jatyr. Bıyl jergilikti bıýdjet qarajaty esebinen rezıdentýrada medısınalyq kadr­lardy daıarlaýǵa 139 grant bólý josparlanǵan.

Jazǵy demalysqa shyǵatyn oqý­shylardyń ýaqytty tıimdi paıdalanýyna da múmkindik jasalmaq. Bıyl oblysta 45 myńnan astam oqýshy bıýdjet esebinen jazǵy saýyqtyrý lagerinde demalady. Jalpy, jaz mezgilinde oblys bo­­­­ıyn­sha 22 saýyqtyrý lageri qyzmet kór­setedi. Onyń 7-eýi memlekettik bolsa, 15-i – jekemenshik. Balalardyń jazǵy demalysyn uıymdastyrý­da arnaıy daıyndyqtan ótken 14 444 pedagog jumys isteıdi. Túrkistan oblysy bilim basqarmasy basshy­synyń mindetin atqarýshy Jandos Mahanbetovtiń aıtýyna qaraǵan­da, 20 myńnan astam bala ata-analar esebinen aqyly demalady.

Al «Qazaqstan halqyna» qory ese­bi­nen oblystaǵy 3 421 oqýshy Túlkibas, Tólebı aýdandarynyń lagerlerinde jazǵy ýaqyttaryn ótkizedi. Jazǵy saýyqtyrý lager­lerine joǵary oqý oryndary men jastar ortalyqtarynan 95 erikti, oblystyq kolledjderden 80 stýdent óndiristik tájirıbege tartylady. Sonymen qatar mektepter janynan uıymdastyrylatyn lagerlerde jergilikti bıýdjet esebinen 10 000 oqýshy jazǵy demalysta bolady. Jazǵy maýsym kezinde barlyq mektepte sport­tyq komandalar jasaqtalyp, jarystar, spartakıadalar, úıirme jumystary, sondaı-aq Túrkistan, Otyrar, Saıram, Báıdibek óńirlerine saıa­hat uıymdastyrylmaq.

Túrkistan oblysy