Arnaýly kitaphana 2022 jyly «О́lke qalamgerleriniń shyǵarmashylyǵy – Braıl qarpinde» jobasyn bastaǵan edi. Aqyn-jazýshylardyń qazaq tilindegi shyǵarmalaryn zaǵıp oqyrmandarǵa qoljetimdi etýdi maqsat etken joba aıasynda búginge deıin Qadyr Myrza Áliniń «Egiz joldar» kitaby, jergilikti aqyn Asantemir Qarshyǵaulynyń «Shiderli sher» jınaǵy jáne I toptaǵy kóz múgedegi, jas aqyn Asylbek Qýanyshqalıevtiń «Júrek sózi» atty tyrnaqaldy týyndysy núkteli-bederli qaripti kitap nusqasynda jaryq kórgen edi. Endi oqyrmandardyń suraýyna oraı tuńǵysh ret kólemdi prozalyq shyǵarma braıl qarpine kóshirilip, úshbólimdi kitap bolyp basylyp shyqty.
«Dástúrli baspadan shyqqan kitapty núkteli-bederli qalypqa aınaldyrý – ájeptáýir mashaqaty bar kúrdeli jumys. Bul úshin kitaptyń barlyq betin skanerlep, qatesin bastan-aıaq tekserip shyǵamyz. Sodan keıin kitaphanamyzdyń qyzmetkeri, tıfloaqparattyq-bıblıografııalyq bólim basshysy Kerbez Qadyrbekova osy mátindi WinBraille arnaıy baǵdarlamasyna salyp, taǵy tekseredi. Braılsha kitap shyǵarý erejesi boıynsha shyǵarma birneshe bólimge bólinedi. Zaǵıp oqyrmandarǵa oqýǵa yńǵaıly bolý úshin erejege saı jol sandaryn saqtaı otyryp basady. Iаǵnı kishigirim áńgimeniń ózin aýdarý ońaı emes. Osynaý qıyn da kúrdeli jumystyń denin bizdiń mamanymyz, ózi de kóz múgedegi Kerbez Erdáýletqyzy jasaıdy. Aıtpaqshy, braıl mátin basylatyn qaǵazdyń ózin A4 formatyna qolmen qıyp daıyndaımyz», deıdi Batys Qazaqstan oblystyq zaǵıp jáne nashar kóretin azamattarǵa arnalǵan arnaýly kitaphana ádiskeri Gúlmaıra Berkinqyzy.
«Abadan» romanyn braıl qarpine aınaldyryp shyǵarý isi bıyl qańtar aıynda bastalyp, tórt aıǵa sozylǵan eken. Saýsaqpen oqylatyn jańa kitaptyń tusaýkeseri arnaýly kitaphanada úlken jıyn bolyp ótti.
Keshke kitap avtory Munaıdar Balmolda, Qazaqstannyń eńbek sińirgen qaıratkeri, «Parasat» ordeniniń ıegeri, ánshi Hatımolla Berdiǵalıev, Jýrnalıster odaǵynyń múshesi, aqyn Nurlan Sádir, tarıh ǵylymdarynyń kandıdaty, Bilim berý isiniń úzdigi Jańabek Jaqsyǵalıev, Sýretshiler odaǵynyń múshesi, músinshi, ustaz Manas Aqqojın, Sýretshiler odaǵynyń múshesi, sýretshi-grafık Bekjan Jumabaev, ánshi, «Eren eńbegi úshin» medaliniń ıegeri Erkin О́tegenov qatysty.
Kesh barysynda Munaıdar Balmoldanyń óleńine jazylǵan «Arman jyldar», «Anamnyń jaqqan oshaǵy», «Qazaq jylqylary», «О́mir, seni súıem» ánderi shyrqaldy. Avtor oqyrman suraqtaryna jaýap berip, shyǵarmashylyq josparlarymen bólisti. Kitaphananyń jas oqyrmandary J.Turashev pen A.Amanjanqyzy jańa shyǵarmanyń Braıl qarpindegi nusqasynan úzindi oqyp, kitaptyń qyzyqty tustaryn tanystyryp ótti.
Aıta ketetin bir oqıǵa, zaǵıptarǵa arnalǵan «Abadan» kitaby bederli-grafıkalyq sýrettermen bezendirilipti. Túz taǵysynyń túrli keıiptegi sýretteri zaǵıp jandarǵa qasqyr qandaı bolatynyn saýsaq ushymen sezinýine múmkindik beredi. «Bizdiń oqyrmandardyń arasynda kózi týǵannan kórmeıtin nemese kishkentaı kezinen kórmeı qalǵan jandar bar ǵoı. Solar úshin biz bóriniń ulyp otyrǵan, taǵy basqa haldegi sýretterin arnaıy baǵdarlamamen núkteli-bederli qalypta beıneledik», deıdi Gúlmaıra Berkinqyzy.
Elimizde braıl álipbıinde memlekettik tilde shyǵatyn ádebıet joqtyń qasy dese de bolady. Qazaqstanda mundaı shyǵarmalardy qazaq tilinde shyǵaratyn arnaıy baspa da joq. Sondyqtan oraldyq kitaphanashylardyń bul isin jankeshti janashyrlyq dese de artyq emes.
Arnaýly kitaphananyń óz dybys jazý stýdııasy da braıl kitaptarynyń aýdıonusqasyn birge daıyndap, kitaphana oqyrmandaryna dısk túrinde usynyp otyr. Kitaphana dıktory Aıdar Jarlyǵapovtyń oqýynda «Abadan» romany jalpy kólemi 20 saǵattyq aýdıokitap bolyp, úsh dıskige basylyp shyqqan.
«Bizdiń kitaphana daıyndap shyǵarǵan barlyq núkteli-bederli kitaptar, aýdıoónimder elimizdiń kitaphanalaryna, arnaýly mektep-ınternattarǵa jiberiledi», deıdi Gúlmaıra Berkin-
qyzy.
«Abadan» romanynyń tusaýkeserine arnaýly kitaphana oqyrmandarynan bólek, Qurmanǵazy atyndaǵy Oral saz kolledjiniń, «Servıs» tehnologııalyq kolledjiniń stýdentteri, Ishki ister mınıstrligi Batys Qazaqstan oblysy mamandandyrylǵan kúzet qyzmeti basqarmasynyń jeke quramy da qatysty.
Batys Qazaqstan oblysy
