Foto: inbusiness.kz
Kompanııa bıyl aqpan aıynyń sońynda kenishtegi qurdymǵa qulaǵan avtobýs pen onyń ishindegi eki azamatty izdeý jumystaryn toqtatyp tastaǵany týraly habarlaǵan edik. «Maıqaıyńaltyn» AQ-nyń jańadan taǵaıyndalǵan dırektory Qaırolla Júrsinbaev 13 mamyrdan bastap qos qutqarýshyny izdeý jumystaryn qaıta jandandyrý týraly sheshim qabyldady.
Bul týraly qutqarýshy Aıdos Shaımerdenniń jary Nursulý Shaımerden habarlady. A.Shaımerden – oıyq astynda jatqan eki azamattyń biri. Ol kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Pavlodar fılıalynda jedel aldyn alý jumystary jónindegi vzvod komandıriniń orynbasary bolyp qyzmet atqarǵan. Al ekinshisi – jedel avtokólik júrgizýshisi Aıyp Tileýbergenov.
– 13 mamyrdan bastap Aıdos pen onyń áriptesin izdeý jumystary qaıta bastaldy. Otbasymyz bul kúndi uzaq ýaqyttan beri taǵatsyzdana kútken edik. Qutqarýshylar jaqyn adamdarymyzdy taýyp alatynyna senimdimiz. Kásiporyn basshylyǵy aıtqandaı, eń áýeli oıyq mańynda ken jynystaryn qazý jumystary júrgiziledi. Sodan soń kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Pavlodar fılıalynyń qutqarýshylary iske kirisedi. Qazirgi ýaqytta jumystar táýlik boıy júrgizilip jatyr. Bas dırektor Qaırolla Júrsinbaev jer astynda jatqan qos azamatty taýyp alǵan soń ǵana shahta iske qosylatynyn jetkizdi, – deıdi Nursulý Shaımerden.
Al «Maıqaıyńaltyn» AQ-nyń jańa basshylyǵy izdeý-qutqarý jumystary týraly aqparat berýden bas tartyp otyr. Taý-ken metallýrgııalyq ónerkásibiniń salalyq portaly metalmininginfo.kz habarlaǵandaı, «Maıqaıyńaltyn» AQ ınvestorlary altyn kenishindegi ónerkásiptik qaýipsizdikti baǵalaý, sondaı-aq izdestirý-qutqarý sharalary men ken óndirý jumystaryn jalǵastyrý úshin «Altynalmas AK» AQ kompanııasyn tartqan. Soǵan oraı 26 sáýirde jańa dırektor taǵaıyndalǵan. Jańa basshylyqtyń aldynda tez arada qos qutqarýshyny taýyp, óndiristi tolyqqandy iske qosý mindetteri tur.
Buǵan deıin de jazǵanymyzdaı, Aıdostyń jary Nursulý Shaımerden kúıeýiniń tiri ekenine eshqandaı úmiti joq ekenin, qutqarýshylar múrdesin qazyp berse, arýlap jer qoınyna tapsyrý sońǵy tilegi ekenin aıtady.
Pavlodar oblysy,
Baıanaýyl aýdany,
Maıqaıyń kenti
