Qaraaspan – Túrkistan oblysyna qarasty aýyl. Ejelgi ýaqytta bul jerde Qaraaspan degen shahar bolǵan.
Qazba kezinde eski qorymda aýqatty otbasy músheleriniń múrdesi men baǵaly dúnıeleri qosa kómilgeni anyqtalǵan.
- Tólebaı tóbe qorymyndaǵy úshinshi obadan ár jyldary jerlengen 5 adamnyń múrdesi tabyldy. Arheologııalyq orynnyń 2 myń jyldan astam tarıhy bar. Zertteýge qatysqan mamandar qundy artefaktilerge qarap osyndaı boljam jasap otyr, - dep habarlady "Habar 24" telearnasynyń tilshisi.
Arheologtardyń tapqan zergerlik buıymdary jasalý tehnologııasymen erekshelenedi. Aıshyq tárizdi altyn syrǵalar asyl tastarmen bezendirilse, turmystyq zattar da qolamen kómkerilgen. Sondyqtan bul biregeı jádigerler Qańly kezeńiniń mádenıetin taǵy da tanı túsýge jol ashty.
- Qos syrǵa zergerlik ónerdiń qaıtalanbas úlgisi ispetti. Men senimdi túrde olardyń Qańly memleketine tıesili ekenin aıta alamyn. Sol zamannyń dástúrli mádenıetinde osyndaı altyndar qoldanylǵan. Kóbine Grek qalalary men Rım ımperııasynda kezdesedi. Biraq, kórip turǵandaryńyzdaı, olar osy óz dalamyzda tabylyp jatyr, - dedi О́. Jánibekov atyndaǵy OQPÝ professory Aleksandr Podýshkın.
Qorymdy zertteý jumystary uzaq jyldar boıy júrgizilip keledi. Bul joly 3 birdeı oba qazylyp, sonyń ekeýi tonalǵany anyqtaldy. Degenmen arheologııalyq oshaqtan tabylǵan han aınasy qundy olja sanatynda. Sonymen qatar irili-usaqty monshaqtar men túıreýish bar. Endi qańqa súıekteri zerttelmek.
- Bul jerde aýqatty adamdar jerlengen. Iаǵnı, bul jerlengen qańqa súıekterine qarap, olardyń ár ýaqyt aralyǵynda jerlengenin baıqaýǵa bolady. Tabylǵan artefaktilerge baılanysty sondaı sheshim shyǵarýǵa bolady. Antropologtarǵa bergen kezde súıekterine jáne tisterine qarap, olardyń jasyn anyqtaıdy, - deıdi arheologııalyq ekspedısııa múshesi Gúlmıra Stamqulova
Tarıhı mańyzǵa ıe jádigerlerdiń birazy arnaıy zertteýden soń "Ordabasy" mýzeıine qoıylady. Al erekshe qoldanbaly óner týyndylaryn respýblıkalyq mańyzy bar mýzeı qoryna ótkizý josparlanyp otyr.
- Byltyr osy Tólebaı tóbede júrgizilgen qazba jumysy barysynda tabylǵan kóptegen zattar, sonyń ishinde keramıkalyq zattar, áshekeı buıymdar sonyń barlyǵy bizdiń Ordabasy qoryq mýzeı qoryna ótkizilgen bolatyn. Bıylǵy jyly tabylǵan zattardyń baǵalyǵyna, qundylyǵyna qarap, jetekshiniń aıtýynsha, ortalyq mýzeı nemese Ulttyq mýzeıge ótkiziletin bolady, - deıdi "Ordabasy" Ulttyq tarıhı-mádenı qoryq mýzeıiniń ǵylymı qyzmetkeri Baqytbek Qasymov
Sala mamandarynyń aıtýynsha, qorymda tabylǵan jádigerler kóne zaman turǵyndarynyń ata-babalardyń tarıhı-mádenı baı murasyn tanýǵa múmkindik beredi. Sondyqtan ejelgi Qara aspan qalashyǵynda qazba isi qaıta jandanady.
