Báıge Pavlodarda bastalyp, Aqmola oblysynda jalǵasady.
23 mamyrda marafon Astana qalasynda aıaqtalady. Alǵashqy kezeńde birden Almaty, Qyzylorda oblystary men Shymkent qalasynan kelgen komandalar jarystan túrli sebeppen shyǵyp qaldy.
«Attardyń shama-sharqyn baǵamdaǵan shabandozdar sáıgúlikterin qınamaı, der kezinde jarysty toqtatqandary jaqsy sheshim boldy», dedi bas tóreshi Nadejda Kýpsova.
Úshinshi kúnniń qorytyndysy boıynsha marafonda 14 komanda qaldy. 21 mamyrda marafon-báıgeniń ekinshi kezeńi aıaqtaldy. Úshinshi kezeń boıynsha Jetisý oblysynyń komandasy jeńimpaz atandy. Mańǵystaý oblysynyń shabandozdary máre syzyǵyna ekinshi bolyp jetse, Almaty qalasynyń komandasy úshtikke ilikti. Al Shyǵys Qazaqstan oblysynyń komandasy jarystan shyǵyp qaldy. Úshinshi kezeńde Túrkistan, Soltústik Qazaqstan, Qostanaı, Abaı, Pavlodar, Aqmola, Ulytaý oblystarynan eki attan, Jetisý, Qaraǵandy, Mańǵystaý oblystary men Astana qalasynan bir-bir attan jarysqa jaramsyz dep tanyldy. Almaty qalasy men Jambyl oblysy bes atpen jarysqa shyǵady.
Alǵashqy úsh jeńimpaz Dúnıejúzilik kóshpeliler oıyndary aldynda 3-7 qyrkúıek aralyǵynda ótetin halyqaralyq marafon-báıgege qatysýǵa lısenzııa alady. Halyqaralyq kezeńge shet memleketterden (Túrkııa, Saýd Arabııasy, Mońǵolııa, Majarstan, Túrikmenstan, Iran, О́zbekstan, t.b.) keminde 15 komanda qatysady dep josparlanyp otyr.
Al marafon jumysyna 2 halyqaralyq jáne 3 el tóreshisi, sondaı-aq 2 halyqaralyq jáne 3 jergilikti mal dárigeri qatysyp jatyr. Olar joǵary standarttardy saqtaý men jylqylardyń saýlyǵyn baqylaıdy. Aıta keteıik, ótken eki jyl qatarynan elimizge esimi belgili áýesqoı veloshabandoz Rabbım Borashov attyly shabandozdarmen birge Astanadan Túrkistanǵa deıingi 1 200 jáne 1 300 shaqyrymdy baǵyndyrǵan edi. Sportshy bul joly da 5 kúndik alamanǵa qatysyp, 500 shaqyrymdy baǵyndyrýdy mejelep otyr.
500 shaqyrymdyq báıge-marafonyn Ulttyq sport qaýymdastyǵy men «Amanat» partııasy, Pavlodar oblystyq ákimdigi, Týrızm jáne sport mınıstrligi birlesip ótkizip jatyr. «Amanat» partııasynyń atqarýshy hatshysy Dáýlet Káribek partııa ulttyq sport túrlerin damytýǵa, sondaı-aq mádenı jáne tarıhı murany nasıhattaýǵa baǵyttalǵan bastamalardy árdaıym qoldaıtynyn aıtady.
– Ulttyq sportty damytý máselesi – árkez Memleket basshysy Qasym-Jomart Toqaevtyń nazarynda. Ulttyq quryltaıda Prezıdent Qazaqstan Uly dala kóshpeli órkenıetiniń tikeleı murageri sanalatynyn, biz ózimizdiń mádenı muramyzdy qorǵap, ilgeriletýimiz kerek ekenin atap ótti. «Uly dala joryǵy» báıgesi partııa qoldaýymen úshinshi jyl qatarynan ótkeli otyr. Marafon-báıge halqymyzdy biriktiretin, ulttyq rýhty nyǵaıtatyn jobaǵa aınaldy, – dedi D.Káribek.
Komandalar bes kún boıy kúnine 100 shaqyrym jol júrip ótýge tıis. Ár 50 shaqyrym saıyn komandalar men olardyń attaryna demalýǵa múmkindik beriledi. Jylqylardyń jaǵdaıyn tájirıbeli veterınarlar baqylaıdy. Aıta ketý kerek, ár komandanyń jolǵa shyǵý ýaqyty ártúrli. Birinshi komanda saǵat 07.00-de, kelesiler eki mınýt aralyqpen jolǵa shyǵady. Nátıjesinde, sońǵy komandanyń sapary 07.36-da bastalady. Komandalardyń qandaı nómirmen jarysatyny jerebe tartý barysynda anyqtaldy.
– «Uly dala joryǵy» marafon-báıgesin úshinshi ret ótkizip otyrmyz. Bul – azamattar men arǵymaqtardyń tózimi men erik-jigeri synǵa túsetin doda. Barlyq sportshymyz osy kúrdeli synaqtan súrinbeı ótip, jorytqanda joldary bolsyn! – dedi Ulttyq sport qaýymdastyǵynyń prezıdenti I.Saljanov.
Komandalar bir-birimen jaryspaıdy, óıtkeni árqaısysynyń qozǵalys ýaqyty ártúrli. Barlyq qashyqtyqty eń qysqa ýaqytta eńsergen komanda jeńimpaz atanady.
