Oblys ákiminiń orynbasary Marat Mýrzıevtiń aıtýynsha, Qulsary qalasynda tasqynnan keıingi sýdy sorý jumysyna Tótenshe jaǵdaılar mınıstrliginen 159 maman, 27 arnaıy tehnıka tartylyp otyr. Bul jumysqa «Jylyoı Tazalyq» JShS-dan 18 vakýým bólingen.
«Mamyrdyń ortasyna deıin Qulsary qalasynyń turǵyn úıleri men kóshelerinen 5,6 mln tekshe metr sý soryldy. Osy jumystyń nátıjesinde 2 906 turǵyn úı sýdan qurǵatyldy. Qazir aýdan ortalyǵynda qurylysy áli tolyq aıaqtalmaǵan 14 turǵyn úı men 7 bıznes nysan áli kúnge deıin sý ortasynda qalyp tur», dedi M.Mýrzıev.
«Jylyoı Tazalyq» JShS dırektory Baýyrjan Abdýrahmanovtyń deregine qaraǵanda, sý tasqynynan keıin 4 689 tonnadan asa qoqys shyǵarylǵan. Qoqys arnaıy polıgonǵa jınaqtalady. Arnaıy tehnıkalar táýligine 50 reıs jasaıdy.
«Kún saıyn 5 brıgada qoqys jınaýǵa jumylady. Brıgadalar tańerteńgi saǵat 08.00-den keshki saǵat 20.00-ge deıin jumys isteıdi. О́ıtkeni bizdiń mindetimiz – úıler men aýlalardy qoqystan tez tazartý. Osylaısha, turǵyndardyń jóndeý jumystaryn júrgizip, úılerin retke keltirýine qolaıly jaǵdaı jasaýymyz kerek. Qulsary qalasyndaǵy sý basqan úılerden keı kúni 1,7 tonnaǵa deıin turmystyq qaldyqtar jınalady. Jaqynda bir kúnde sý basqan aýlalardan 10 tonnadan asa qoqys pen turmystyq qatty qaldyqtar shyǵaryldy», deıdi seriktestiktiń ýchaske basshysy Asqar Temirjan.
Atyraý oblysy
