Salynǵan órnekteri qazaqtyki emes, kavkazdyq zerlermen kómkerilgen, ilmeshegi de erekshe, qoldan jasalǵan buıym. Belgisiz zergerdiń uzaq ýaqyt boıy kóz maıyn taýysyp jasaǵan asyl buıymyn Soltústik Qazaqstan oblystyq murajaıynan kórdik. Osy murajaıdyń bólim meńgerýshisi Ǵalııa Jaqypova bul eksponattyń tarıhy men jasalýy jóninde aıtty. Ony mýzeıge Qoshan aqsaqaldyń nemeresi Murat aǵamyz tapsyrypty.
Qoshan aqsaqaldyń taǵy bir balasy akademık Amanjol Qoshanovty (1934-2021) halyq jaqsy biledi. Ol ekonomıka ǵylymdarynyń doktory, Ulttyq ǵylym akademııasynyń akademıgi atanǵan. Memlekettik syılyqtyń laýreaty, Qazaqstanǵa eńbek sińirgen qaıratker. Uzaq jyldar boıy akademııanyń Ekonomıka ınstıtýtyn basqarǵan. Naryqtyq ekonomıkanyń bilgiri retinde tanylyp, 1995 jyldan Ekonomıka ınstıtýtynyń naryqtyq ekonomıka teorııalary bólimin basqarǵan, al 2010 jyldan ómiriniń sońyna deıin Áleýmettik baǵdarlanǵan ekonomıka teorııalary ortalyǵynyń dırektory boldy. Ol 400-deı maqalanyń, 29 monografııanyń avtory.
Al akademıktiń ákesi Qoshan Jantileýov aqsaqaldyń ózi shejireshi, tereń bilikti áńgimeshi bolǵan. Ol tarıhty, aqyndar men jyraýlardyń shyǵarmalaryn tegis bilip, kezinde halyq muralaryn jınaǵan jazýshy, ǵalym Muhtar Maǵaýınge ákesiniń aǵasy Shal aqyn týraly mol maǵlumat bergen. Muhtar aǵamyz 1964 jyly Qoshan aqsaqaldyń úıinde qona jatyp, Shal aqyn týraly kóp málimet jazyp alǵan.
Myna belbeýdi aqsaqalǵa kavkazdyq zergerdiń ózi syıǵa tartypty. Turmysta tózimdi ári sándi belbeýdi aqsaqal 50-jyldardyń ortasynan ómiriniń sońyna deıin tastamaı, býynyp júrgen. Ákesinen qalǵan asyl kózdi Murat Qoshanov uzaq jyldar boıy saqtap, aqyry mýzeıge tapsyrǵan. Sóıtip, ol qazir kóńilge túrli oı salar ótken tarıhymyzdyń bir kúnderin eske salyp, mýzeı kórermenderiniń kózaıymyna aınalyp tur.
Stalındik qýǵyn-súrgin jyldarynda Qap taýynyń turǵyndaryn Qazaqstanǵa kóshirdi emes pe? Ásirese 1944 jyly Qap taýy óńiri halqyn tutastaı Qazaqstan men Orta Azııaǵa jer aýdardy. Sonda kelgen kavkazdyq sheberdiń biri Qoshan aqsaqaldan bir qamqorlyq kórip, óziniń qolyndaǵy asyl dúnıesin syıǵa tartyp ketken bolýy kerek. Mýzeı qyzmetkerleri onyń tarıhyn áli de zerttep, anyqtaı túsemiz dep otyr.
Soltústik Qazaqstan oblysy
