Foto: e-cis.info
Reseılik sút zaýyttary men shekaralas óńirlerdegi arzan shıkizat búginde jergilikti sút sharýashylyǵyna úlken aýyrtpalyq túsirip otyrǵany málim. Dúken sórelerin kórshi eldiń sút ónimderi jaýlap barady. Buǵan deıin pavlodarlyq zaýyttar jergilikti sharýashylyqtardan sút satyp alýǵa lımıt engizýi múmkin ekenin, sebebi Reseıdiń shekaralas aýmaqtarynan otandyq kásiporyndarǵa arzan shıkizat usynyp otyrǵandar baryn jazǵan edik. Bul máselege búginde elimizdiń táýelsiz uıymdary men iri sút zaýyttary nazar aýdara bastaǵany baıqalady.
Pavlodar oblysynyń kásipkerler palatasyna Petropavldaǵy «Eurasian Milk» JShS zaýytynyń ókilderi arnaıy kelip, kezdesý ótkizdi.
Respýblıkalyq iri qara maldyń sútti jáne aralas tuqymdary palatasy dırektorynyń orynbasary Berik Nyǵmashev qazir kórshi memleketterge ónimdi Qazaqstanǵa ımporttaý tıimdi bolyp otyrǵanyn jetkizdi. Sondyqtan elimizdiń kóptegen sút zaýytynda ónim ótkizýde qıyndyqtar týyndaıdy. Bul aýylsharýashylyq taýar óndirýshilerimizge teris áser etedi.
«Biz Pavlodar oblysyna usynyspen keldik, sebebi keıingi kezderi bizge kóptegen zaýyttan, taýarly sút fermalarynan sút satyp alynbaıtynynan habardar boldyq. Qazir úlken memlekettik baǵdarlama jumys isteıdi, ol boıynsha 2,5 paıyzben qarjylandyrý berilip otyr. Biraq biz erteń bul baǵdarlama durys nátıje bermeýi múmkin dep alańdaımyz. Sútti eshkim satyp almasa, ol kimge kerek? Otandyq taýar óndirýshiler sút óndirýge kóp aqsha jumsaıdy, al biz tıisti nátıjege qol jetkize almaı kelemiz», dedi ol.
Pavlodar oblysy kásipkerler palatasynyń dırektory Erqanat Ábenov sútti ótkizý máselesi alańdatarlyq ekenin atap ótti. Jergilikti palata fermerlerge bul turǵydan kómektesýde aıanyp qalmaıtynyna sendirdi.
Petropavl qalasynda ornalasqan zaýyt «Eurasian Milk» JShS bas dırektorynyń orynbasary Sergeı Kýzmenkov kompanııa tamaq ónimderimen baılanysty úlken holdıngke kiretinin aıtty. Aıtýynsha, zaýyt qazir ósip, óndirisin keńeıtý ústinde. Kompanııa táýligine 120 tonna sútti óńdeıdi, bul kólemdi eki-úsh jyl ishinde odan ári birneshe ese arttyrýǵa nıetti. Bul rette kompanııa shıkizatty untaq kúıinde qabyldamaıtynyn eskerý kerek.
«Men sútti qazir jáne birden satyp ala bastaımyz dep ýáde bere almaımyn. Sebebi ár fermada súttiń sapasy ártúrli. Jetkizýshilermen qarym-qatynas ornatý boıynsha belgili bir ereje bar. Eger talqylaýǵa nıet bolsa, biz fermalarǵa baryp, ónimmen tanysa alamyz», dedi ol.
Bul jańalyq jergilikti fermerlerdi qýantyp otyr. Alaıda kórshi óńirdegi zaýyttyń shıkizat qabyldaý múmkindigi asa mol bolmaıtynyn, ári tek sapaly sút qana alatynyn eskersek, oblys bıligine bul máseleni túbegeıli sheshýge umtylys qajet-aq.
Pavlodar oblysy
