Qostanaı óńirindegi bul aýyldardy sý basyp, úıler qırap, sharasyz qalǵan halyq túgel kóshirilgen edi. Sondyqtan qoǵamdyq qordyń músheleri jergilikti turǵyndardyń janaıqaıyn tyńdap, qandaı muqtajdyq basym ekenin bilip, jaǵdaıdy kózben kórý úshin osy aýyldarǵa arnaıy barǵan. Ýaqytsha panalaıtyn kıiz úı suraǵan halyqtyń tileýi kóp uzamaı oryndaldy.
– Sý tasqynynyń saldarynan tirnektep jınaǵan barlyq dúnıe-múlkinen, malynan aırylǵan halyqtyń jaǵdaıy áli kúnge deıin kúrdeli ekenine kózimiz jetti. Turǵyndardyń kópshiligi panalaıtyn oryn tappaı qınalyp otyr eken. Sondyqtan kóptiń tileýi kıiz úı boldy. Biz jınalǵan halyqqa ýáde etip, birden tapsyrys berdik. Tapsyrysymyz ýaqytynda daıyn bolyp, minekeı, búgin kıiz úılerdi aýyl ishine quryp, halyqqa tabystadyq. Bastysy, kıiz úılerdiń sapasyna mán berdik. Barlyǵy talapqa saı jasaldy. Jergilikti halyq rızashylyǵyn, sheksiz alǵysyn bildirip jatyr. Qandaı qıynshylyq bolsa da, halyqpen birge bolaıyq, – deıdi «Salıqaly urpaq» qoǵamdyq qorynyń dırektory Qasym Qasabekov.
Sý tasqyny kezinde Arqalyq qalasyna qarasty Ekidiń jáne Qyzyl juldyz aýylynyń turǵyndary tikushaqtyń kómegimen qaýipsiz aımaqqa, Arqalyq qalasyndaǵy evakýasııalyq pýnktterge kóshirilgen edi. Jalpy, qala aýmaǵyndaǵy sý basqan aýyldarda 87 úı, al tek Ekidiń aýylynyń ózinde 38 baspana turýǵa jaramsyz dep tanylǵan. Búginde jańa úılerdiń qurylysy bastalyp, halyqqa birte-birte ótemaqy tólenip, shyǵyn ótelip, kásipkerler tarapynan da tıisti kómek kórsetilip jatyr.
