Jan-jaqty kómek – kóńilge demeý

Úıli bolǵandardyń biri Iýlııa Sábıtova eken. Ol óziniń uly jáne ata-anasymen birge úsh bólmeli úıge qol jetkizipti. Buryn Oıqalanyń Kalıýjnyı kóshesindegi jekemenshik úıde turǵan kórinedi. Iýlııa jańa úı alǵanyna qýanyp qalǵanyn jasyrmady. «Prezıdentke aıryqsha rahmet aıtqym keledi. Bizdiń jaqqa kelgen­de Memleket basshysy eshkimniń eskerý­siz qalmaıtynyn, bári úıli bolatynyn aıtqan edi, sol sózinde turdy»,
dedi ol.

Oblys ákiminiń at basyn tiregen ekinshi úı – Qýanysh pen Gúlden Seri­kovterdiń páteri. Olar da buryn Oıqalanyń Permınov kóshesinde 1959 jyly salynǵan eski úıde turǵan eken. Jańa úı bergende burynǵymen aýmaǵy birdeı bir bólmeli jaıly páterdi ózderi tańdapty. Eki bóbegi bar jas otbasyna bul úı tarlaý, biraq ózderiniń burynǵy úıimen salystyrǵanda artyq ekenin úı ıesiniń áńgimesinen baıqap qaldyq. «Bizdi dalaǵa tastamaı mynadaı jaıly páter bergen bılikke rızamyz. Aýmaǵy birdeıdi alasyzdar degen soń osy 36 sharshy metrlik páterdi ózimiz qaladyq», dedi Qýanysh.

Jekemenshik úılerde turǵysy ke­le­tinderge qalanyń «Solnechnyı-2» sha­ǵyn aýdanynda 520 sapaly úıler salynyp jatyr. Qazir olardyń qury­lysy qyzý júrip tur. «Jas kelse – iske» degendeı ondaǵy qurylystar­dy júrgizýge «Aýyl» partııasynyń bastamasymen stýdenttik qurylys otrıa­dy quryldy. Onyń qataryna jer­­gilikti kolledjderdiń jazǵy ka­nı­kýlǵa shyqqan stýdentteri tar­tylmaq. Olardyń kóbi – qurylys ju­mystarynan habary bar bolashaq ma­mandar. «Aýyl» partııasynyń ob­lystaǵy fılıalynyń basshysy, isker azamat Qaırat Pishenbaev qury­lys otrıadyn jasaqtaýda úlken belsendilik kórsetip júr. Jýyrda osy otrıadpen kezdesýge respýblıkalyq «Aýyl» partııasynyń tóraǵasy Serik Egizbaev ta keldi. Ol oblys ákimimen birge stýdenttik qurylys otrıady­nyń múshelerimen kezdesip, olarǵa tilektestigin bildirdi.

Stýdenttik qurylys otrıadtary­nyń belsendi eńbegi keńes odaǵy jyldarynda qatty eskeriletin. Jaz boıy qurylysta jumys istep, kúzde ózderine kıim, tamaq jáne basqa da kerek-ja­raqtaryn alý úshin jastar aıanbaı, sharshaý degendi bilmeı jumys isteıtin edi. Onyń ústine jastar jasamys qurylysshylardaı emes, sanasy joǵary bolǵandyqtan eńbekke adal bolatyn. Sondaı bastamanyń qaıta kóterilgeni – jaqsylyqtyń jańa jarshysy shyǵar degen oıǵa qaldyq. «Aýyl» partııasynyń tóraǵasy Serik Egizbaev pen oblys ákimi Ǵaýez Nurmuhambetov te jastarǵa belsendilik tanytqany úshin alǵys aıtyp, qozǵalystyń mańyz­dylyǵyn atap ótti.

Al aýdandardan jaraqtandyryl­ǵan mehanıkalyq brıgadalar qazir tas­qyn basqan shaǵyn aýdandardaǵy sý kirgen úılerdiń mańyn tazartyp, qalpyna keltirýge bolatyndaryn jóndeýge kiris­ken. Mundaǵy jumystardyń da ońaı­lyqpen aıaqtalmaıtyny kórinip tur.

Oblystyq ákimdikte «Zıksto» AQ men Petropavl qalasynyń ákimdigi arasynda sý tasqynynan zardap shekken turǵyndarǵa arnalǵan jańa úıler men páterlerdi jıhaz jáne iri turmystyq jaraqtarmen qamtamasyz etý boıynsha yntymaqtastyq týraly memorandým jasaldy. Bul qujatqa Petropavl qalasynyń ákimi Serik Muhamedıev pen zaýyttyń bas dırektorynyń mindetin atqarýshy Aıdos Bekmaǵambetov qol qoıdy. Qaıyrymdylyq kómek retinde «Zıksto» zaýyty jańa salynǵan 520 úı men satyp alynatyn 197 páterdi jıhazdar jáne turmystyq tehnıkamen qamtamasyz etetin boldy. Oblys ákimi kásiporynnyń basshylyǵyna tasqynnan zardap shekken turǵyndarǵa demeýshilik kómek kórsetkeni úshin alǵysyn bildirdi.

Úılerin sý basqan shaǵyn aýdan­dardyń balalaryna jazǵy demalysty belsendi uıymdastyrý jumystary qol­ǵa alynyp jatyr. Kanıkýl ýaqy­tynda 11 demalys lageri jumys isteıdi. Bul oryndarda sý basqan shaǵyn aýdan­dardaǵy mektep oqýshylary dem alady. Qazirdiń ózinde barlyq balanyń 94 pa­ıyzy qaıda saýyqtandyrylatyny ­josparlanyp qoıǵan. Demalys maý­symy 10-15 maýsymda ashylyp, árqaı­sy­sy 10 kúnge sozylyp, 5 kezekti qam­tıdy. Osy ádispen 6 145 oqýshy qam­tylady. О́ńir basshysy jazǵy demalys maýsymynda balalardyń qaýipsiz­di­gi­ne basa nazar aýdarýdy tapsyrdy.

Soltústik Qazaqstan oblysy