Osyǵan baılanysty jergilikti Aýylsharýashylyq jáne jer qatynastary basqarmasyna habarlastyq. Olardyń málimetinshe, 120 jylyjaıdan turatyn keshen sonaý 2012 jyly «Aýyl sharýashylyǵyn qarjylaı qoldaý qory» aksıonerlik qoǵamy esebinen salynyp, jeke kásipkerge lızıngke berilgen. «Bul jumysqa oblys bıýdjetinen bir tıyn da bólingen joq» desedi basqarma mamandary. Tartylǵan ınfraqurylym da kásipker esebinen júrgizilgen.
«Aýyl sharýashylyǵyn qarjylaı qoldaý qory» AQ keıinnen «Agrarlyq nesıe korporasııasy» aksıonerlik qoǵamyna qosylý jolymen taratylady. Iаǵnı talap etý quqyǵy osy korporasııaǵa ótip, búginde olar sharttyq mindettemelerdi oryndamaýyna baılanysty bereshekti óndirip alý úshin sotqa talap-aryz bergen.
«Agrarlyq nesıe korporasııasy» AQ Qyzylorda oblystyq fılıalynyń dırektory Mahanbet Turmahanovtyń aıtýynsha, 10 gektarlyq alqap ıesiz emes. Olardyń jylyjaılardy qaraýyldaý qyzmetin toqtatqanyna da kóp bola qoımapty.
Alǵashqy lızıngke alýshy mindettemesin oryndamaǵasyn keri qaıtarylyp, keshenge ınvestor izdep, satylymǵa da shyǵarǵan kezi bolypty. Tek 2017 jyly ǵana bir kásipker osy iske bel býyp, jumys bastaıdy. Tipti alǵashqy ónimin de shyǵarypty. Biraq kóp uzamaı onyń tirligi de tuıyqqa tirelgen. 2021 jyly kásipker 10 gektarlyq alqapty bólip, qaryzdyń jartysyn moınyna alǵandar 5 gektaryna kúrish kóshetin daıyndamaq ta bolǵan eken. Biraq bul da aıaqsyz qalyp tur. Ekinshi márte mindettemelerin oryndaı almaǵandardan byltyr «Agrarlyq nesıe korporasııasy» AQ jylyjaılardy qaıtaryp alý jumystaryn bastap ketti.
«Áýeli bizge keltirilgen shyǵyndy anyqtaýymyz kerek. Osy úshin mamandandyrylǵan kompanııa izdedik. Olar kelip, jan-jaqty zerttep, jylyjaılardyń qural-jabdyǵynyń isten shyǵyp, jaramsyz bolyp qalǵandyǵyn rastaıtyn anyqtama berdi. Bul shyǵynnyń bári kásipkerler esebinen óteledi», deıdi fılıal jetekshisi.
Jylyjaı kesheniniń jumysyn bastaǵan bıznesmenniń, keıingi eki kompanııa ıeleriniń de aty-jóni men basqa da derekteri banktik qupııa retinde saqtalady. Jalpy, berilgen 600 mln teńgege jýyq qaryzdyń osy ýaqytqa deıin 30 paıyzǵa jýyǵy qaıtarylǵan.
Korporasııa keshenge jańa ınvestor izdep te kóripti. Ákimdikke, «Baıqońyr» ÁKK» AQ men «Atameken» Ulttyq kásipkerler palatasyna da hat jazǵan. Biraq osy kúnge deıin isti ári qaraı jalǵastyratyn ilkimdi jan tabylmaı otyr.
«Bul – qor men kásipker arasyndaǵy másele. Munda bıýdjettiń qarjysy joq. Bıznestiń qaı salasynda da is bastaǵandardyń báriniń kóshi birden túzelip sala bermeıtinin bárimiz bilemiz ǵoı. Bul da – sondaı táýekeli aqtalmaǵan tirliktiń biri. Bizge qaıtarylǵannyń ózinde de qaryz alýshy barlyq mindettemesin oryndaıdy. Oǵan eshqandaı kúmán bolmaýy kerek», deıdi Mahanbet Aqylbekuly.
Qazir is Qyzylorda oblysynyń mamandandyrylǵan aýdanaralyq ekonomıkalyq sotynda qaralyp jatyr.
Qyzylorda oblysy
