Qýanyshty habardy estigen bette Ekaterına: «Týǵan kúnimniń qarsańynda Olımpıada joldamasyn ıelendim. Maǵan sengen týǵan-týystarym men jankúıerlerime zor rızashylyǵymdy bildiremin. Sizderdiń qoldaýlaryńyz meni jeńiske jeteledi. Bul meniń ómirlik maqsatym edi. Eren eńbek pen tynymsyz talpynystyń arqasynda josparymdy júzege asyra aldym. Soǵan qatty qýanyp otyrmyn. Tórtjyldyqtyń basty dodasynyń bastalýyna áli eki aı bar. Sol ýaqytta men jatpaı-turmaı daıarlanamyn», dep aqtaryla sóıledi.
Ekaterına Shabalına – 26 jasta. Ol – birqatar halyqaralyq jarystyń jeńimpazy jáne júldegeri. Byltyr jerlesimiz Saýd Arabııasynyń Ál-Hýbar qalasynda ótken Azııa chempıonatynda basty qarsylastary qytaılyq Ksınıý Lın men gonkongtyq Beılı Braýndy artqa tastap, altynnan alqa taqty. Shabalına tanymal bapker Maksım Krıattiń qol astynda jattyǵady. Sóıtip, Parıjde alaýy tutanatyn Olımpııa oıyndaryna qatysatyn sportshylarymyzdyń sany 55-ke jetti.
