Foto: gov.kz
- Bıyl Qytaıda ótetin jastar arasyndaǵy Azııa birinshiligine qatysatyn ústel tennısshileri Almatyda anyqtaldy. Bul jarysta elimizdiń uldar komandasy ekinshi oryn aldy. Aldymyzda – Iran. Dál sol parsy eli ókilderi men О́zbekstandy alǵa jibergen qyzdarymyz úshinshi satyǵa taban tiredi. Bizdiń komanda quramynda Alan Qurmanǵalıev, Sarvınoz Mirqadyrova, Janerke Kóshkimbaeva, taǵy basqa tanymal sportshylar óner kórsetti.
- Kásipqoı rıngte asa jeńil salmaqta (53,5 kg) kúsh synasyp júrgen qazaq qyzy Balaýsa Muzdıman (3-0, 2 KO) óziniń kelesi kezdesýin 1 mamyrda Almatyda ótkizedi. Belgili bapker Saǵat Musahanovtyń shákirti úndistandyq Monıka Sınghpen (5-1, 3KO) qolǵap túıistiredi.
- Italııanyń Todı qalasynda stend atýdan «Green Cup» týrnıriniń tusaýy kesildi. 300 sportshynyń qatysýymen ótip jatqan jarystyń alǵashqy kúni Nıkıta Moıseev «trapta» qola medaldy ıelendi. Jattyǵýdyń dál sol túrinde quramynda Moıseevten bólek, Asylhan Aısalbaev pen Bogdan Konchenko syndy mergenderi bar bizdiń komanda úzdik úshtikti túıindedi.
- 2023/24 jylǵy fýtbol maýsymynyń qorytyndysy boıynsha Eýropanyń eń mergen oıynshysy anyqtaldy. Dástúrli «Altyn býtsy» bul joly Mıýnhenniń «Bavarııasy» men Anglııa ulttyq quramasynyń shabýylshysy Harrı Keınge buıyrdy. Bıyl ol Býndeslıgada 36 gol soqty. Ekinshi jáne úshinshi oryndarda – gvıneıalyq Serý Gırassı («Shtýtgart», 28 gol) men fransııalyq Kılıan Mbappe («Parı-Sen-Jermen», 27 gol).
- Fýtzaldan bıyl kúzde О́zbekstanda jalaýy jelbireıtin álem chempıonatynyń jarys kestesi belgili boldy. D tobyna óner kórsetetin Qazaqstan quramasy tusaýkeser oıynyn 15 qyrkúıekte Ispanııaǵa qarsy ótkizedi. 18 qyrkúıekte Lıvııa jáne 21 qyrkúıekte Jańa Zelandııamen sheberlik baıqasamyz.
- Tennısshilerdiń álemdik reıtıngi jańartyldy. TOP-200 oıynshynyń qataryna engen otandastarymyzdyń nátıjeleri mynadaı: Elena Rybakına – 4-oryn, Aleksandr Býblık – 17-oryn, Iýlııa Pýtınseva – 39-oryn, Aleksandr Shevchenko – 59-oryn, Mıhaıl Kýkýshkın – 136-oryn, Denıs Evseev – 167-oryn, Beıbit Juqaev – 171-oryn, Tımofeı Skatov – 199-oryn. Erler men áıelder arasynda serbııalyq Novak Djokovıch pen polshalyq Iga Sventek kósh bastap tur.
- О́zbekstannyń ataqty sportshysy Oksana Chýsovıtınaǵa birqatar rekordtyq kórsetkish tıesili. Ol 1992-2021 jyldar aralyǵynda 8 Olımpııa oıyndaryna qatysty. Jer-jahandaǵy birde-bir gımnasshy osyndaı kórsetkishimen maqtana almaıdy. Sonyń arqasynda Oksananyń esimi Gınness rekordtar kitabyna endi. Ataqty sportshy 1992 jyly Barselonada altyn, 2008 jyly Beıjińde qola medaldy oljalady. Álem chempıonatynda 11 ret (3 altyn+4 kúmis+4 qola) jeńis tuǵyryna kóterildi. Bıyl jazda Chýsovıtına 49 jasqa tolady. Soǵan qaramastan ol Parıj Olımpıadasynda óner kórsetý úshin jatpaı-turmaı daıarlandy. Biraq Azııa chempıonatynda jaraqat alýyna baılanysty tórtjyldyqtyń basty dodasynan shet qaldy. Sóıtip, Oksana Chýsovıtına óziniń toǵyzynshy Olımpıadasyna bara almaıtyn boldy.
- 1 maýsymda Almatydaǵy ADD Arenada kásipqoı boks keshi ótedi. Sol jarystyń basty jekpe-jeginde elimizdiń qos boksshysy – Vıktor Kotochıgov (14-2, 5 KO) pen Mıras Ertanov (5-1, 3 KO) ózara kúsh synasady. Sondaı-aq atalǵan týrnırde alys-jaqyn shet memleketterden kelgen taǵy birqatar bylǵary qolǵap sheberleri qolǵap túıistiredi.
- Halyqaralyq hokkeı federasııasy (IIHF) óz reıtıngin jańartty. Úzdikter tiziminde 3 305 upaı jıǵan Qazaqstan 15-satyǵa jaıǵasty. Al kósh basynda – Kanada quramasy (4 100). Sondaı-aq TOP-5-tiktiń qataryna Reseı (4 065), Fınlıandııa (3 955), Chehııa (3 945) jáne Shveısarııa (3 945) komandalary endi.
