Ol robot-qondyrǵynyń aty «О́zime kómektese almaımyn» dep atalady. Robottyń qurylymy – óte qyzyq. Ol – gıdravlıkalyq suıyqtyqsyz jumys isteı almaıdy, bylaısha aıtar bolsaq, «óledi». Adamnyń jany sekildi. Onyń baǵdarlamasy suıyqtyqty ustap turýǵa tyrysatyndaı jasalǵan. Al suıyqtyq onyń janynan quldılap aǵyp ketetindeı júıelengen. Qanǵa uqsaıdy. Robottyń mıy suıyqtyq taýsylsa, óziniń de isten shyǵatynyn biledi, úzdiksiz ózine qaıtaryp otyrady. Eń qorqynyshtysy, baǵdarlamashylar robotqa bos ýaqytynda kórermender aldynda «baqyt bıin» bıletetin júıe qosqan. Qultemir 32 túrli qımyl túrin jasaı aldy. Oılap qarańyzshy, robot ómir úshin kúrestiń arasynda baqyt bıin bıleýge májbúr. Jer betinde tirshilik etip júrgen qanshama adamnyń beınesi kóz aldyńa keledi. Janarymyz kýá bolǵan, jadymyzda saqtalǵan...
Joba alǵash iske qosylǵan kezde robot baqytty bolypty. Bılepti, kóp ýaqytyn kópshilikke arnapty. О́ıtkeni suıyqtyqty ustap turý ońaı boldy. Al biraz jyl ótkennen keıin sharshap, kókeıin «úmitsizdik» basty. Sebebi ómirin saqtaýǵa kúshi jetpeı, áli kete bastady. Tipti bıleýge ýaqyty jetpedi. Robot «ǵumyrynyń sońǵy kúnderinde» ómirdi saqtaý men qan ketý arasyndaǵy sheksiz kúres sıkline tústi. Isten shyǵarynda qanshama adam jantalasqa kýá boldy. 2019 jyly robot gıdravlıkalyq suıyqtyqty taýysyp, ustaı almaı, jumys isteýin toqtatty. Álem jylady. Áleýmettik jeli shýlady. Biraq eshkim ol robottan ózin kórmedi.
Amal neshik, ol osyndaı taǵdyrǵa baǵdarlamalanǵan. Ne istese de, qansha tyryssa da, ómirin saqtaı almady. Biraq baǵdarlamashylar robot isten shyqqanda, bar shyndyqty aıtty. Eger ol ómirin saqtaý úshin jantalasyp, rıtmdi jıiletpegeninde, tynyshtyq qalpyn saqtaı alǵanda, uzaq ýaqyt ómir súrer edi. Baqyt bıin de biraz jyl bıler edi. Al biz she? Biz ne ister ekenbiz?
