Ajal qudaıyn aldap soqqannan keıin Sızıftiń arqasynda jer beti tegis ólimnen qutylady. Dúnıeniń tepe-teńdigi zańy buzylady. Qaharlanǵan olımp qudaılary qylmyskerdi eń aýyr jazaǵa kesedi. Onyń jazasy mynaý: Sızıf úlken bir tasty shyń basyna shyǵarýy kerek. Biraq mejege jetken saıyn ádire qalǵyr álgi tas etekke qaraı domalap ketedi. Sızıf ony qaıyra kóteredi, tas qaıyra yldıǵa quldılaı túsedi. Osylaısha, máńgilikke tasty ıterýmen bolady ol. Sóıtip, maqsatyna eshqashan jete almaıdy.
Mine saǵan baıansyz tirlik!
Keıde aı boıy aıyl jımaı tapqan-taıanǵany tamaǵyna ǵana jetetin baýyrlardyń osynaý aıanyshty jaǵdaıyn kórgende, Sızıftiń jaǵdaıy eriksiz eske túsedi...
Taǵy sol mánsiz áreket! Turmystyq túıtkilden kóterilip, minez minbesinen dúrbi salsaq ta, sol kórinis kóz aldymyzǵa keledi.
Maqtangerlik ýaǵdasymen marapatqa umtylý;
Kúrdeli sóılep kúdireıip, aqyldy bolǵan syńaı tanytý;
Eshkimge qajetsiz eńbek jazyp, elendiń degen emeýrin kútý júıkeńe júk, sanańa salmaq bolýǵa tatymaıtyn kúshenshek kisiniń tirligi ǵana. «Baıansyzǵa bári qul, jyndanbaǵan pende joq» dep bir-aq sózben búkil oıyńdy búkteı salǵan Shákárim de áýlıe ǵoı, shirkin.
Aıtpaqshy, domalap ketken tasyn qaıta ıterýge joǵarydan túsip bara jatqan sáti bar ǵoı Sızıftiń. Sol ýaqytta ol ne oılady eken?
