Mysaly, Áýlıekól aýylynda ótken sanıtarlyq tazartý aksııasyna memlekettik jáne bıýdjettik uıymdardyń qyzmetkerleri, eriktiler, aýyl turǵyndary, kásipkerler bar – uzyn-yrǵasy 180-nen asa adam qatysty. Týǵan jerdi abattandyrý, qorshaǵan ortaǵa qamqorlyq tanytý baǵytyndaǵy ıgi is-sharalarǵa jergilikti sharýa qojalyqtary tehnıkalaryn bólip, qoqys úıindilerin shyǵarysýǵa atsalysyp jatyr.
О́tken senbilikte aýdan turǵyndary Áýlıekól aýylynyń soltústigindegi orman-saıabaqty qoqystan tazartyp, kóbine jastar kelip bas qosatyn demalys aýmaǵyn retke keltirip qoıdy.
«Taza Qazaqstan» jalpy respýblıkalyq aksııasyna Áýlıekól aýdanynyń turǵyndary eki aıdan beri belsendi qatysyp jatyr. Eńbek ete júrip, aýyldastarmen áńgimelesip, boı jazý da bir ǵanıbet qoı. Memleket basshysy Qasym-Jomart Toqaev atap ótkendeı, elimizdi abattandyrý, kógaldandyrý – úlken memlekettik máni bar mańyzdy is. Árbir adam aınalasyn taza ustap, tal egip, týǵan jerdiń tabıǵatyna qamqorlyq kórsetýdi ómir saltyna aınaldyrýy kerek. Tazalyq – densaýlyq kepili. Mysaly, osy tazalyq maýsymynyń ishinde qanshama aýyldyń aınalasy tazaryp, qys boıy beıbereket tastalǵan, kóktemgi qyzyl sý aıdap ákelgen qoqystan arshylyp, kórgen kóz súısinetindeı ajary kirip qaldy», deıdi Áýlıekól aýdandyq qoǵamdyq keńesiniń tóraıymy Almıra Jansúgirova.
О́tken seısenbide Qostanaı aýdanynda da dál osyndaı senbilik uıymdastyryldy. Jergilikti ákimdik janynan jumys istep jatqan Jastar resýrstyq ortalyǵynyń mamandary Qostanaı aýyl sharýashylyǵy kolledjiniń stýdentterimen birlesip, Tobyl qalasy arqyly ótetin saıdy turmystyq qoqystardan tazartty. Tazalyq asııasyna 50 shaqty adam qatysty.
Qalanyń birneshe kóshesin qıyp ótetin saı turmystyq qaldyqtarǵa, qańyltyr qutylarǵa tolyp qalǵan. «Mundaı kórinis qalamyzǵa abyroı ápermeıdi. О́kinishke qaraı, keıingi kezderi shashylyp jatqan qoqystyń janynan beıjaı ótip ketýge et úırenip ketken sııaqty. «Taza Qazaqstan» aksııasynyń maqsaty da – jurtty qorshaǵan ortaǵa nemketti qaraýdan aryltyp, tazalyqqa, ásemdikke kóz úıretý», deıdi jastar resýrstyq ortalyǵynyń eriktileri. Jastar ortalyǵynyń bastamasy kolledj stýdentteri tarapynan qoldaý taýyp, qoqys toly saı aınalasy bir-eki saǵattyń ishinde tazaryp qaldy.
Beıimbet Maılın aýdanynyń ortalyǵy Áıet aýylynda da jańbyrdyń sýy aǵatyn aryqtardy tazartý, laı tolyp, qaırań basyp qalǵan sý arnalaryn arshý jumystary júrgizildi. Turǵyndar Áıettegi ashyq alańqaılar men mekeme ǵımarattarynyń aınalasyna qaýlap ósip kele jatqan jasyl shópti julyp, ortalyq kóshelerdi sypyryp shyqty. Aksııaǵa 30 adam qatysty, qoqys shyǵarýǵa arnalǵan bir tehnıka tartyldy.
«Áıet aýylyndaǵy tazalyq aksııasy – turǵyndardyń ekologııalyq mádenıetin arttyrýǵa yqpal etetin mánge ıe mańyzdy is-sharanyń biri. El bolyp birigip, bir jarty kún tyrmaq, sypyrǵysh, kúrek ustap aýyldyń ishi-syrtyn tazartyp qoısaq, ózimizge jaqsy ǵoı. Aýyl turǵyndary senbilikke eki aıtqyzbaı shyǵyp, eldiktiń, birliktiń ne ekenin kórsetip jatyr. Bul – óte jaqsy úrdis. Búgingi is-sharaǵa qatysqandardyń barlyǵyna rızamyn», deıdi aýdan ákiminiń orynbasary Baýyrjan Ahmetov.
«Taza Qazaqstan» ekologııalyq aksııasy aıasynda Qostanaı qalasyndaǵy «Trıatlon parkinde» de sanıtarlyq tazartý jumysy atqaryldy. Senbilikke 150-ge jýyq adam atsalysyp, demalys ornynyń aınalasyn qamys, qýraıdan tazartyp, birneshe kólik qoqys shyǵardy.
Qostanaı oblysy
