О́mirlerin qaýipke tikken patrýldik polıseıler kúre jol ústinde bolýy yqtımal qaıǵyly oqıǵanyń aldyn aldy. Oqys jaǵdaı 24 mamyrǵa qaraǵan túni oryn alǵan. Patrýldik polısııa batalonynyń komandıri Azamat Ahmetovtiń aıtýynsha, eki shaǵyn avtobýsta jazǵy lagerden qaıtqan 22 bala bolypty. 23 mamyr kúni tústen keıin Býrabaı aýdanynan shyqqan kolonnadaǵy oqýshylardyń qaýipsizdigin qamtamasyz etý úshin oblystyq batalonnyń 4 vzvodynyń qyzmetkerleri Búrkit Alshynbaev pen Ryspek Qabdyrashev olarǵa erip júrdi.
Túngi saǵat 02:15 shamasynda Ekaterınbýrg – Astana avtojolymen Jaqsy aýdanynyń aýmaǵynda júrip kele jatqan patrýldik ekıpaj qarsy jolaq boıymen qozǵalǵan aýyr júk kóligin baıqaıdy. Polıseıler júrgizýshige faralarymen jáne arnaıy qurylǵy arqyly dabyl bergenimen, júk kóligi balalar mingen avtobýsqa qarama-qarsy júrip kele jatady. Keıinirek belgili bolǵandaı, kólik buzylyp, júrgizýshi ony basqara almaǵan.
Avtobýsta balalardyń kele jatqanyn eskerip, patrýldik ekıpaj óz ómirlerin qııýǵa daıyn boldy. Alaıda, baqytyna oraı, eń sońǵy sátte aýyr júk kóligi qarsy jolaqtan kilt burylyp úlgeredi. Degenmen onyń tirkemesi patrýldik kólikke mehanıkalyq zaqym keltirdi.
B.Alshynbaevtyń aıtýynsha, jol boıynda belgilengen qashyqtyqty saqtaǵan shaǵyn avtobýstardyń júrgizýshileri de sheberlik tanytyp, apatty jaǵdaıdy kórip, birtindep jol jıegine shyǵyp ketken. Al polıseılerge durys sheshim qabyldaý úshin 1-2 sekýnd qana ýaqyt kerek bolypty. «Soqqyny ózimizge qabyldaýǵa daıyn boldyq», deıdi B.Alshynbaev.
Bul qarapaıym sózderdiń artynda kez kelgen polısııa qyzmetkeri qaýip tóngen jaǵdaıda kórsetýge daıyn úlken batyldyq pen janqııarlyq jatyr. Tótenshe jaǵdaı jasaǵany úshin júk kóliginiń júrgizýshisi jaýapqa tartyldy. Tártip saqshylary da, balalar da din aman.
