Eńbek adamyna arnalǵan baspana baǵdarlamasy

Rýdnyıdaǵy «Gornıak» keshe­nin­de ótken forýmǵa «Otbasy bank» basqarma tóraıymynyń orynbasary Nurlan Aqshanov, qala ákimi Vıktor Ionenko, «SSKО́B» AQ áleýmettik jobalar jáne áleýmettik qamtamasyz etý bóliminiń basshysy Aleksandr Maka­renko, ken baıytý kombı­na­tynyń jumysshylary, bank qyzmetkerleri, Rýdnyıda úı turǵyzyp jatqan qurylys kom­panııa­larynyń basshylary qa­tysty.

Qala ákimi kópshilikti Rýd­nyı­da halyqty baspanamen qamtý máselesiniń qalaı júzege asyrylyp jatqanynan habardar etti.

«Búgingi tańda biz eski turǵyn úılerdi qalpyna keltirýge basa kóńil bólip otyrmyz. Byltyr Lenın kóshesindegi 107, 215-shi, Gorkıı kóshesindegi 104-shi turǵyn úıdi qaıta jóndeýden ótkizip, el ıgiligine tapsyrdyq. Maýsym aıynda Oktıabrdiń 50 jyldyǵy kóshesindegi 30 jyl boıy qaraýsyz turǵan 47-shi tur­ǵyn úı paıdalanýǵa beriledi. Qazir Toporkov kóshesindegi 162-shi úıge jóndeý júrgizilip jatyr. Sáýletti turǵyn úıler kóp bolǵan saıyn qalanyń ajary ashylyp, sáni kire túsedi. Sondyqtan biz eń birinshi kezekte, eski úılerdiń bárin jańartyp, qalanyń syrtqy kelbetine kórik berýdi kózdep otyrmyz. Eski úılerdi qalpyna keltirýge oblys bıýdjetinen 2 mlrd 400 mln teńge bólindi. Aldaǵy ýaqytta respýblıka bıýd­je­tinen taǵy 7 mlrd 400 mln teńge qarjy bólinedi. Munyń syrtynda, Rýdnyıda «Aıat» tur­ǵyn úı kesheniniń qurylysy bas­taldy. Bul úılerdiń birazy «Otbasy bank» usynyp otyrǵan tıimdi baǵdarlamalar arqyly ha­lyqqa qoljetimdi bolatynyna senim­di­miz», dedi V.Ionenko.

«Otbasy bank» «ERG» kompanııasymen kóp jyldan beri yntymaqtastyqta jumys istep keledi. Forým barysynda bank mamandary «Sokolov-Sarybaı ken baıytý birlestiginiń» jumys­shy­laryna «Otbasy bank» usy­nyp otyrǵan ıpotekalyq múm­kin­dikter jóninde jan-jaqty áńgimelep berdi. Atalǵan bank qostarapty korporatıvtik joba aıasynda «ERG» kompanııasynyń Pavlodar, Ekibastuz, Aqsý, Hrom­taý, Rýdnyı qalalaryndaǵy ká­sip­oryndarymen tyǵyz baılanysta jumys júrgizip keledi. Bul áriptestiktiń eki joly bar. Birinshisi – «ERG» kásiroryndary úı salyp, ony óz jumysshylaryna jalǵa beredi. Mundaı úılerge qonystanǵan adam birden depozıt ashyp, páterdiń jarty qunyn jınaǵan soń, ári qaraı bankten 5%-ben nesıe alyp (JTSM 5,2%-dan bastap 5,3%-ǵa deıin), ózi jalǵa alǵan baspanany birjola satyp ala alady. Sonymen qatar kásiporyn jumysshylary óz qalaýy boıynsha 5%-dyq nesıemen úı satyp alýǵa quqyly. «ERG» kompanııasy salyp jatqan turǵyn úıler, ókinishke qaraı, bárine birdeı jete bermeıdi, sondyqtan forýmǵa arnaıy kelgen «Otbasy bank» basqarma tóraıymynyń orynbasary Nurlan Aqshanov jumys­shylardy «Otaý», «Naý­ryz» baǵdarlamalaryna qaty­syp kórýge shaqyrdy.

«Biz bıyl baspanasyz aza­mat­tarǵa arnalǵan «Otaý», Naýryz» dep atalatyn eki birdeı baǵ­darlamany iske qostyq. Bul baǵ­dar­lamaǵa qatysatyn azamat­tar­dyń basynda sońǵy 5 jyl ishinde tirkelgen baspana bolmaýy kerek. Jyldyq syıaqy mólsherlemesi – 9% (JTSM 9,2%-dan bastap 11,8%-ǵa deıin). Ol jyldan-jylǵa kemı beredi. Bastapqy jarna – 20%. Biz «Otaý» baǵdarlamasyna ótinish qabyldaýdy toqtattyq. Atalǵan baǵdarlama aıasynda konkýrstan ótken 8 myń adam qazir qaryzdy óteı alý qabileti boıynsha tekseristen ótip jatyr. Mysaly, Qostanaıda bul tekseristen 80 adam oıdaǵydaı ótti. «Otaý» baǵdarlamasy boıynsha Astana, Qostanaı, Almaty sııaqty iri qalalardan jańa páter satyp alýǵa bolady. Al Rýdnyı tárizdi oblystyq mańyzy bar shaǵyn qalalardan páterdi qoldan satyp alýǵa da bolady. Jańa páterlerdiń bári bizdiń «Baspana Market» portalynda tur. Bul baǵdarlamaǵa qatysý úshin klıenttiń shotynda 1 mln teńge bolý kerek, depozıt merzimi 18 aıdan kem bolmaýǵa tıis. О́kinishke qaraı, bul baǵdarlamaǵa qatysqysy kelgender kóp bolǵanymen, olardyń depozıtiniń merzimi 18 aıǵa tolmaı qalyp jatty. Atyraýda ótken Ulttyq quryltaıdyń úshinshi otyrysynda Memleket basshysy Qasym-Jomart Toqaev «Otaý» ıpotekalyq baǵdarlamasynyń el ishinde úlken suranysqa ıe bolyp otyrǵanyn aıta kelip, endi aýyl jáne aýdan ortalyǵynyń turǵyndaryna arnalǵan jańa turǵyn úı baǵdarlamasyn qol­ǵa alý kerek» degen tapsyrma bergen edi. Sondyqtan biz jańa baǵdarlamany iske qostyq. Ult­tyq quryltaı naýryz aıynda ótkendikten, jańa baǵdarlama da «Naýryz» dep atalady. Bul baǵdarlama boıynsha turmysy tómen otbasylardyń baspanaly bolýyna jaqsy múmkindikter qarastyrylǵan», dedi Nurlan Aqshanov.

Forým barysynda banktiń ıpo­tekalyq baǵdarlamalary ar­qy­ly baspanaly bolǵan qara­paıym turǵyndar, eńbek adam­dary kópshilik aldyna shyǵyp, ózderiniń páterge qalaı qoljet­kiz­geni týraly áńgime etti. Mysaly, óńirde eki jyldan beri Qostanaı oblysy ákimdigi men «Otbasy banktiń» «Qostanaı jastary» dep atalatyn birlesken jobasy nátıjeli jumys istep jatyr. Atalǵan baǵdarlama aıasynda «Otbasy bank» muǵalim, dáriger ma­mandar men poshta, polısııa, tótenshe jaǵdaı qyzmetkerleriniń baspanaly bolýy úshin jyl sa­­­ıyn jeńildetilgen nesıege 2 mlrd teńge qarjy bólip otyr. Búginde baspanaly bolyp, baǵdarlama jemisin kórip otyrǵandardyń ishinde polısııa qyzmetkeri Qaırat Rahmetov te bar.

«Baspana alý – árbir jas otbasynyń eń birinshi armany. 2020 jyly ishki ister organdaryna jumysqa kirgen soń, birden «Otbasy bankinen» depozıt ashtym. Eki jarym jyldaı páter jaldap turdyq. 2023 jyly «Qostanaı jastary» baǵdarlamasy arqyly konkýrs­tan ótip, baspanaly boldyq. Depozıtimde bar-joǵy 1,5 mln teńge jatqan. Soǵan qaramastan qysqa merzim ishinde óz páterimizge kirgende, qýanyshymyzda shek bolǵan joq. Jubaıym ekeýmiz alǵashqy kúni bul úıdiń endi bizdiki ekenine sener-senbesimizdi bilmeı abdyrap qalǵanymyz ras. Buǵan deıin 70 myń teńgege páter jaldap kelgenbiz. Al jańa páterimizge 13 jylǵa aıyna 88 myń teńgeden tólep turamyz. Jalǵa 70 myń tólegennen góri, óz páterińe 88 myń nesıe tólegen áldeqaıda jaqsy. «Qostanaı jas­tary» sııaqty tıimdi jobalardyń jas otbasylar úshin paıdasy zor. Osy sátti paıdalanyp qymbat bas­panany qoljetimdi etip otyrǵan «Otbasy bankine», oblys ákimdigine óz otbasymyzdyń atynan shyn kóńilmen rızashylyq bildirgim keledi. Sizder jas otbasylarǵa úlken qoldaý kórsetip jatyrsyzdar», deıdi Qaırat.

Rýdnyıda turatyn О́mirálıev­ter­diń otbasy da «Otbasy ban­kiniń» demeýimen baspana alý baqy­ty­na kenelip otyr. Erli-zaıypty Talant pen Janardyń ekeýi de «Sokolov-Sarybaı ken baıytý óndiristik birlestiginde» jumys isteıdi. 2018 jyly «50/50» baǵdar­la­masy arqyly úsh bólmeli páter alǵan jas otbasy sodan beri taǵy birneshe baǵdarlamaǵa qatysyp úlgergen.

«Keıin avtokóligimizdi satyp, «Otbasy bank» arqyly taǵy 2 bólmeli páter aldyq. Odan keıin ol úıimizdi satyp, «Otbasy bank» arqyly 4 bólmeli páter aldyq. Qazir «Otbasy bank arqyly» tórtinshi úıge depozıt jınap jatyrmyz. Taıaýda oǵan 500 myń teńge memleket syılyǵy qosyldy. Qazir tórtinshi úı alý úshin qujat daıyndap jatyrmyz. Bizdiń esh­qandaı tamyr-tanysymyz joq. Tek armandadyq, maqsat qoıdyq. Rýdnyıdaǵy bank fılıalynan Roza esimdi keńesshiniń kóp kómegi tıdi. Qandaı máselemen barsaq ta, erinbeı-jalyqpaı bárin túsindirip, jan-jaqty qoldaý kórsetip otyrdy. Sondyqtan ásirese, baspanasyz júrgen jas otbasylarǵa depozıt ashyńyzdar, jala­qylaryńyzdyń aıyna 20 paıyzyn sol depozıtke salyp otyrsańyzdar, úsh jyldan keıin óz baspanalaryńyzǵa qol­jet­kizesizder degim keledi», deıdi Janar.

Jalǵyz ózi eki balany tárbıe­lep otyrǵan Aleksandra Býten­konyń joly bolǵany sonshalyq, jalǵyzbasty ana «Otbasy bank» arqyly sý tegin páterge ıe bol­ǵan. Aleksandra da «Sokolov-Sarybaı ken baıytý óndiristik birlestiginde» separatorshy bolyp jumys isteıdi. 2018 jyldan beri páter kezegine turǵan jalǵyzbasty ana ótken jyly «Otbasy bank» men ken baıytý kombınaty uıymdastyrǵan utys oıynyna qatysady.

«Aldymen «Otbasy bankke» baryp depozıt ashtym. Kóp keshikpeı byltyr tamyzdyń birinde páter utyp aldym. Shynymdy aıtsam, men jurt jıi aıtatyn «Armanda, armanyń oryndalady» degen sózge eshqashan senbeıtinmin. Biraq tosynnan kelgen baspana qýanyshynan keıin armandaýdy úırene bastadym. Qazir eki balammen úsh bólmeli páterimde turyp jatyrmyn. Byltyr Asanáli esimdi ulym dúnıege kelgen. Osy balam dúnıege kele salyp, baspana utyp alǵanymyzdy jaqsylyqqa joryp, bul – Asanálim alyp bergen páter dep ishteı qýanyp otyramyn. «Otbasy banktegi» depozıtim áli ashyq. Aı saıyn aqsha salyp otyramyn. О́ıtkeni eki balam bar, kózdi ashyp-jumǵansha olar da erjetedi. Sondyqtan keleshekte taǵy bir páter alyp qoısam ba degen maqsat bar. Qazir elimizde jas otbasylarǵa jan-jaqty qoldaý jasalyp jatyr. Burynǵydaı jumyssyzdyq joq. Qaı jerge baryp eńbek etem deseń de, erik ózińde. Aılyǵymyz jaqsy. Balalar balabaqshaǵa barady. Balabaqsha da, mektep te, emhana, aýrýhana da úıime jaqyn. Janymyzda balalardy aparyp demaldyratyn saıabaq bar», deıdi Aleksandra.

Jıyn barysynda «Otbasy bank» basqarma tóraıymynyń orynbasary Nurlan Aqshanov jumysshylarǵa «Otaý», «Naýryz» baǵdarlamalaryna qatysýdyń reti men tıimdiligi jóninde keńinen áńgimelep berdi. Ipotekalyq baǵdarlamalardyń tanystyrylymy qurǵaq baıandaý emes, Erjigit, Maqsat esimdi jas mamandardyń basynan ótken oqıǵalar jelisine qurylǵan komıks túrindegi tartymdy kórnekiliktiń kómegimen ótti.

Jıyn sońynda forýmǵa qa­tysý­shylar arasynda «Otbasy bank» júzege asyryp jatqan ıpo­tekalyq baǵdarlamalarǵa qa­­tys­ty utys oıyny uıymdas­ty­ryldy. Oıynǵa 200-ge jýyq adam qatysyp, jıyrma shaqty jeńimpaz sháınek, shańsorǵysh, útik tárizdi turmysqa qajet zat­tar­ǵa ıe boldy.

Forýmnan keıin oblys ákim­digi men «Otbasy bank» jáne «Eurasian Resources Group» bolyp Rýdnyıdaǵy «SSKО́B» AQ qyzmetkerleriniń turǵyn úı jaǵdaıyn jeńildetilgen shartpen jaqsartý jónindegi kelisimshartqa otyrdy. Baǵdarlamaǵa qatysý­shy­larǵa «Otbasy bank» jyldyq 5% ústememen (JTSM 5,2%-dan bastap 5,3%-ǵa deıin) zaım beredi. Ári mundaǵy mindetti bastapqy jarna mólsheri – nebári 10% bolady.

О́zara túsinistik pen áriptes­tik týraly memorandýmǵa Qos­tanaı oblysynyń ákimi Qumar Aqsaqalov, «Otbasy bank» bas­qarma tóraıymynyń orynbasary Nurlan Aqshanov pen Eýrazııalyq top (ERG) bas dırektorynyń qarjy jónindegi orynbasary Danııar Rahmatýllaevtar qol qoı­dy.

Kelisimshartqa qol qoıǵan ár tarap baǵdarlamany iske asy­rýǵa 500 mln teńge baǵyttaıdy. Nátı­jesinde, jumsalatyn jalpy qarajat mólsheri 1,5 mlrd teńgeni quraıdy. Qomaqty qarjy bıyl kenish salasynda eńbek etip júrgen 100 otbasynyń baspanaly bolýyna septigin tıgizbek.

Kelisimshart boıynsha, eýra­zııa­lyqtar arasynan ákim­diktegi baspana kezeginde turǵyndarǵa ba­symdyq beriledi. Sondaı-aq Rýdnyı qalasynan ekinshi na­ryq­tan baspana alý múmkindigi de qarastyrylǵan. Baspana alýǵa úmittilerdiń tizimin kompanııanyń turǵyn úı komıssııasy túzedi. Baǵdarlamaǵa sońǵy 5 jyl ishinde respýblıka aýmaǵynda óziniń jáne otbasy músheleriniń atyna tirkelgen baspanasy bolmaǵan, úıge muqtaj qyzmetkerler qaty­sa alady.

Irikteýden ótkender mindetti 10% bastapqy jarnany salǵan soń, «Otbasy bank» olarǵa 5% ústememen zaım beredi. Jyl­dyq tıimdi ústemeaqysy 5,2%-dan ­bas­talatynyn da aıta ketken jón. Zaımnyń eń joǵarǵy mól­sherdegi kólemi – 20 mln teńge. Baǵdarlamaǵa qatysýshy qym­bat páter alǵysy kelse, oǵan jeke qa­ra­jatyn salýǵa nemese zeı­net­aqy jarnasynan artylǵan salymyn paı­dalana alady.

«Otbasy bankpen» aradaǵy uzaq jyldar boıǵy senimdi se­rik­testigimiz jaqsy nátıje berip otyr. Biz birlese otyryp, kún­de­likti qajyrly eńbegimen el eko­no­mıkasynyń nyǵaıýyna eseli úles qosyp júrgen qyz­met­ker­le­ri­mizdiń baspana máselesin tolyq sheshýge tyrysamyz. «ERG» – áý bastan áleýmettik baǵdarlanǵan kompanııa. Áli de osy baǵytynan jańylmaıtynyn aıtqym keledi. Ekonomıkadaǵy aýmaly-tókpeli jaǵdaıǵa qaramastan, osyndaı ıgi baǵdarlamalardy iske asyrý arqyly eýrazııalyqtardyń turmys jaǵdaıyn jaqsartýdy jalǵastyra beremiz», deıdi «ERG» dırektorlary keńesiniń tóraǵasy Aleksandr Mashkevıch.

Sońǵy 11 jyl ishinde «ERG» qyz­met­kerleriniń ishinen 4 myń 634 otbasy «Turǵyn úı baǵ­dar­lamasy» arqyly baspanaly bolǵan. Bıyl taǵy 440 otba­sy qonys toıyn toılamaq. «Otbasy bankpen» birlesip qolǵa alyn­ǵan teńdessiz baǵdarlama ken sa­la­syndaǵy kásiporyn qyz­met­ker­­leriniń bastapqy jarnasyz, tıimdi ústememen úıli bolýyna jol ashyp otyr.

«Baqytty, kóńili jaıly qyz­­­metkerler – kez kelgen kásiporynnyń eń qundy re­sýrsy. Qyz­metkerlerdi tek eńbek­aqy ǵana emes áleýmettik jeńil­dik­ter, kásibı órleý men ósý múm­kin­dikteri, jumys kúninen soń qýana qaıtatyn óz úı – óleń tóse­gi de yntalandyrady. Bizdi eń­bek adamdarynyń «Otbasy bank­ke» júgine otyryp ózderiniń bas­pana máselesin tıimdi sheship alyp jatqany qýantady. Búginge deıin biz usynǵan korporatıvtik ónimniń arqasynda elimizdiń ár qıyryndaǵy shahterler, metallýrgter, energetıkter, qury­lys­shylar, oqytýshylar men dári­ger­ler jalpy sany 1 myń otbasy baspanaly boldy. Endi kóp ótpeı Qostanaı oblysynda da qonys toıy toılanady», dedi «Otbasy bank» basqarma tóraıymynyń orynbasary Nurlan Aqshanov.

Qostanaı oblysy