Ilıa Ilın – jyldyń úzdik aýyr atletshisi

Keshe Astanada «Jyldyń úzdik aýyr atletshisi» ataǵynyń laý­reattaryn saltanatty túrde marapattaý rásimi ótti. Oǵan Premer-Mınıstrdiń orynbasary Berdibek Saparbaev qatysty. Bul syılyqty kezinde «Aýyr atletıka álemi» jýrnalynyń negizin qalaǵan ári sonyń bas redaktory bolǵan Ieno Boskovıch taǵaıyndaǵan bolatyn. Sodan beri ol jyl saıyn dástúrli túrde erler men áıelder arasyndaǵy eń úzdik aýyr atletshige berilip keledi. Bıylǵy jyly aıtýly ataqqa qazaqstandyq eki dúrkin Olımpıada chempıony Ilıa Ilın men reseılik Olımpııa oıyndarynyń chempıony Tatıana Kashırına ıe boldy. Úzdik sportshylar Halyqaralyq aýyr atletıka federasııasynyń «Worldweigthing» (Aýyr atletıka álemi) jýrnaly uıymdastyrǵan ınternet-daýys berý arqyly anyqtaldy. Onda álemniń 46 elinen 2 000-ǵa jýyq daýys tirkeldi. Sóıtip, daýys berýdiń qorytyndysy 13 naýryz kúni shyǵarylyp, 2014 jyldyń úzdik aýyr atletshileri bolyp joǵaryda atalǵan sportshylar tanyldy. Daýys sany boıynsha áıelder arasyndaǵy ekinshi oryndy álemniń úsh dúrkin chempıony, qazaqstandyq Zúlfııa Chınshanlo ıelendi. Úshinshi oryn Qytaı sportshysy Deng Veıge berildi. Al erler arasyndaǵy úzdik aýyr atletshige daýys berýde ekinshi oryn Olımpıada, álem chempıony Lıao Heıge buıyrdy. Úshinshi orynǵa reseılik Rýslan Albegov ıe boldy. Saltanatty marapattaý rásimine Mádenıet jáne sport mınıstri Arystanbek Muhamedıuly, Halyqaralyq aýyr atletıka federasııasynyń (IWF) prezıdenti Tomash Aıan jáne IWF birinshi vıse-prezıdenti Nıký Vlad, Sporttyq jekpe-jek jáne kúsh qoldanylatyn sport túrleri konfederasııasynyń prezıdenti Tımýr Qulybaev qatysty. Onda Tomash Aıan Halyqaralyq aýyr atletıka federasııasynyń syılyǵy ekinshi jaǵynan «Ieno Boskovıch atyndaǵy Kýbok» dep atalatynyn, osy Kýbokta sportshynyń esimi jazylatynyn atap ótti. Bul syılyqty otandastarymyz alǵash ret alyp otyrǵan joq. 2005 jáne 2006 jyldary Ilıa Ilın aıtýly nomınasııanyń eki márte laýreaty atanǵan bolsa, 2010 jyly syılyqty Svetlana Podobedova, 2013 jyly Zúlfııa Chınshanlo alǵan bolatyn. Dastan KENJALIN, «Egemen Qazaqstan». Sýretti túsirgen Erlan OMAROV, «Egemen Qazaqstan».