Foto: Oblys ákimdigi
Atyraý óńirin tasqynnan qorǵaý úshin Qorǵanys mınıstrliginiń №30212, №5571, №6655, №82796 áskerı bólimderiniń, Mańǵystaý, Aqtóbe, Túrkistan, Almaty, Qyzylorda oblysynan, Shymkent qalasynyń tótenshe jaǵdaılar departamentiniń, Tótenshe jaǵdaılar mınıstrligi №52859 áskerı bóliminiń jáne Ulttyq ulan qyzmetkerleri eki aı tasqynnyń aldyn alý sharalaryna kómektesti.
Jıynǵa jınalǵandar Jylyoı aýdany Qulsary qalasynda qyzmettik mindetin atqarý kezinde qaza tapqan Atyraý oblysy TJD «О́rt sóndirý jáne avarııalyq-qutqarý jumystary qyzmetiniń» №1 mamandandyrylǵan órt sóndirý bóliminiń bólimshe komandıri, azamattyq qorǵaý serjanty Rahym Beıbarys Jalǵasbaıulyn mınýttyq únsizdikpen eske aldy.
Oblys basshysy kómekke kelgenderge alǵys bildirdi.
«Sizder halyqpen birge Jaıyqtyń boıynda judyryq bop jumylyp, jankeshtilikpen eńbek ettińizder.
Jylyoı jurtyna járdem berip, Mııaly aýylyn aman alyp qalýǵa jáne kúni-túni zalaldyń zardabyn joıý úshin ter tóktińizder.
Bul kúnderi biz ata-babalarymyzdan jalǵasqan qundylyǵymyz – birlik pen yntymaqtyń naǵyz úlgisin kórdik.
Sonymen rýhtandyq, jigerlendik. Birligimizdiń Jańa Qazaqstannyń dińgegi bop qala bererine kóz jetkizdik. Sizderge Atyraý jurtshylyǵynyń sheksiz rızashylyǵyn jetkizip alǵys aıtamyn», dedi S.Shápkenov.
Asaý tolqyndy aýyzdyqtaý jumystaryna belsene qatysqan birqatar qyzmetkerge Tótenshe jaǵdaı mınıstriniń, oblys ákiminiń Alǵys haty jáne oblystyq ardagerler keńesiniń medali tabystaldy.
