Keshe Astanada «Amanat» ıntellektýaldy klýbynyń kezekti otyrysy ótti. Oǵan sarapshylar, úgit-nasıhat ýaqytynda BAQ pen áleýmettik jelilerge úzdiksiz monıtorıng jasap kelgen zertteýshiler men medıa-sarapshylar qatysyp, «Saılaý-2015: negizgi trendteri men qorytyndylary» degen taqyrypta pikir almasty.
Qatysýshylar saılaý naýqany kezindegi saıası tehnologııalar men úgit-nasıhat jumystarynyń júzege asyrylýy, buqaralyq aqparat quraldary men áleýmettik jelilerdiń róli, daýys berýge shaqyrý aksııalarynyń nátıjeleri, saılaýdan keıingi ózgerister týraly áńgime qozǵady.
Qazaqstan strategııalyq zertteýler ınstıtýtynyń dırektory Erlan Qarın saılaý naýqany bastalǵaly beri, QSZI men basqa da ǵylymı-saraptamalyq ortalyqtar birlesip, ózgeshe pishinde saıası naýqanǵa atsalysqanyn jetkizdi.
«Iаǵnı, saılaý naýqany kezinde barlyq óńirge shyǵyp, sarapshylardyń óńirlerdegi kezdesýlerin ótkizdik. Bir aıta keterligi, óńirlerde qazirgi qalyptasqan jaǵdaıǵa, eldegi saıası-ekonomıkalyq, áleýmettik jaǵdaılarǵa baılanysty óte kóp, tyń pikir bar eken. Bizdiń jıyndar ashyq pishinde ótti. Jańa, qyzyqty oılar aıtylyp jatty. Sondyqtan, saılaý naýqany qalaı bolǵanda da qoǵamda jınalǵan belgili bir ózekti máselelerdi aldyńǵy qatarǵa shyǵaryp, solarǵa bıliktiń, qoǵamnyń, azamattardyń nazaryn taǵy bir aýdartýǵa sebepker boldy dep esepteımiz. Kez kelgen saılaý naýqany shyn mánisinde qalaı ótip jatsa da, árqashan da qoǵam men memlekettiń ishindegi úderisterdi, ulttyq, memlekettik máselelerdi jaryqqa shyǵaryp, jarııa etkizedi. Sondaı jaǵdaı bıylǵy jylǵy saılaý naýqany barysynda da boldy», – dedi E.Qarın.
Qazaqstan strategııalyq zertteýler ınstıtýtynyń aǵa ǵylymı qyzmetkeri Alýa Joldybalına saılaý naýqany BAQ arqyly óńirlerde joǵary deńgeıde, belsendi túrde talqylanǵanyn, BAQ-tyń barlyq kandıdattar týraly bir kólemde, tolyqqandy aqparat bergenin atap ótti.
«Máselen, Abai.kz resýrsy turaqty túrde 3 kandıdattyń saıası baǵdarlamasyn tanystyrdy. Úgit-nasıhat jumystaryna qatysty sholý jasap otyrdy. Jalpy, 2015 jylǵy prezıdenttik saılaý qoǵam tarapynan keń qoldaýǵa ıe boldy. Bir atap óterligi, BAQ 2015 jylǵy prezıdenttik saılaý naýqanyna arnalǵan arnaıy saıttyń paıda bolýy saılaý tehnologııalardyń jańa deńgeıge kóterilgenin kórsetti degen tujyrym jasady. BAQ saılaý naýqanynyń búginde birlesken sıpatta ótip jatqanyn aıta kele, halyqtyń elektoratty mádenıetin damytýǵa, el turǵyndaryn mańyzdy saıası sharaǵa jumyldyrýǵa yqpal etip otyr degen baǵasyn berýde», – dedi Alýa Joldybalına.
Saıasattanýshy Erlan Saıyrov bul saılaýda saıası kózqarastardyń, saıası dúnıetanymnyń balamaly baǵyttary berilgenin jetkizdi.
«Bul jolǵy saılaý Qazaqstannyń saıası mádenıetin belgili bir dárejege kóterýge yqpal etken kezeń boldy dep oılaımyn. Biz saılaýdy halyqty saıası turǵydan joǵary deńgeıge kóterýdiń mektebi dep esepteýimiz kerek. Saılaý kóp bolǵan saıyn halyqtyń saıası sanasy óse beredi. Iаǵnı, saıası úderis kóp bolǵan kezde saıası mádenıet qalyptasady. Bul saıası naýqan Qazaqstandy saıası turǵydan damytýdyń basqa bir kezeńiniń aldynda turǵan úlken jattyǵý tárizdi boldy», – dedi saıasattanýshy.
Otyrysqa qatysýshylar, sondaı-aq, álemdegi ártúrli geosaıası úderisterdiń shıelenisip turǵan kezinde, olardyń jaǵymsyz yqpalynyń aldyn alý úshin de saılaý naýqanyn ótkizý mańyzdy degen oılaryn ortaǵa saldy.
Láıla EDILQYZY,
«Egemen Qazaqstan».
