Kollajdy jasaǵan – Záýresh Smaǵul, «EQ»
Memlekettik rámizder – ulttyq baılyǵymyz, el tarıhyna, ulttyq uly murattarǵa, memlekettik tilge, mádenıet pen salt-dástúrge degen tereń qurmettiń bastaý kózi. Álem aldynda sandaǵan ǵasyrlyq taǵylymdy tarıhy bar táýelsiz, egemen el ekenimizdi aıqyndaıtyn da – Tý men Eltańba. Túrli resmı, halyqaralyq is-sharalarda Ánuranymyz shyrqalǵanda nemese kók Týymyz kóterilgende árbir otandasymyzdyń júregin maqtanysh pen patrıottyq sezim kerneıdi.
Memlekettik rámizderde beınelengen qundylyqtarǵa elimiz júrgizip otyrǵan san qyrly saıasat negizge alynǵan. Ol – ashyqtyq, beıbitshilik, erkindik, táýelsizdik, qoǵamdyq kelisim. Ortasynda shańyraq beınelengen altyn kún, qalyqtaǵan qyran sulbasy men Eltańba beınelengen. Kók baıraq elimizdiń barsha azamattaryna ortaq shańyraqtyń nyshany retinde álemge jańa, táýelsiz memleket – Qazaqstan Respýblıkasyn áıgileıdi.
Qasıetti qundylyq retinde memlekettik rámizderdiń ornalasýyna qatysty birneshe naqty shart bar. Aıtalyq, memlekettik mekemelerdiń kireberisinde ornalasatyn Memlekettik týǵa túngi ýaqytta da jaryq túsip turýy shart. Sondaı-aq sýrette tý únemi oń jaqqa qaraı jelbirep turýǵa tıis. Mekeme basshylarynyń jumys bólmesinde ornalasatyn Memlekettik tý men Memlekettik eltańbanyń ornalasý reti arnaıy talaptarǵa sáıkes bolýy kerek.
2020 jyldyń qazan aıynda Prezıdent Qasym-Jomart Toqaev Memlekettik rámizderdi paıdalaný týraly zańnamany qaıta qaraý kerektigin málimdedi: «Qoldanystaǵy zańnamada týymyzdy paıdalanýǵa qatysty shekteýler bar. Mysaly, páterlerdiń balkonyna nemese úılerdiń qabyrǵasyna tý ilýge tyıym salynǵan. Zańnamalyq jáne normatıvtik aktilerdi, eń aldymen, memlekettik rámizderdi paıdalaný qaǵıdalaryn qaıta qaraý qajet. Parlamenttiń birqatar depýtaty men azamattarymyzdyń elimizdiń memlekettik rámizderin, atap aıtqanda, Memlekettik týdy keńinen qoldaný týraly usynysyn qoldaımyn», dep atap ótti.
Sonymen qatar Memlekettik rámizderdi halyqtyń jappaı qoldanýyna qatysty buryn qabyldanǵan shekteýlerdi azaıtý, el azamattarynyń memlekettik týdy óz turǵyn úıleriniń balkondaryna nemese qabyrǵasyna ilýine zańnamalyq turǵydan ruqsat berý qajettigi jóninde tapsyrma berdi. Osydan keıin týdy balkonǵa ilýge resmı ruqsat etildi.
Jalpy, mundaı tájirıbe álemniń birqatar elinde bar. Máselen, Túrkııadaǵy kópqabatty úılerdiń qabyrǵalary, balkondary jáne mańyzdy dep sanalatyn ǵımarattardyń syrtqy qasbetteri týmen únemi kómkerilip turady. Sonymen qosa túrli buqaralyq, rýhanı-mádenı, sporttyq is-sharalarda, tipti jekemenshik úılerdiń tórinde de qyzyl baıraqtyń kórkem kóz tartatynyn jıi baıqaýǵa bolady.
Joǵaryda atap ótkenimizdeı, Memleket basshysynyń tapsyrmasymen búginde azamattardyń memlekettik týdy patrıottyq maqsatta keńinen paıdalanýyna mol múmkindik jasalyp otyr. Qazirde el turǵyndary ózi turatyn úıdiń balkonyna, terezesine nemese kóligine kók baıraǵymyzdy ilip qoıa alady. Alaıda memlekettik rámiz taza bolýy, durys ornalasýy jáne zańnamada belgilengen standarttarǵa sáıkes bolýǵa tıis.
Memlekettik rámizder dúnıejúzilik deńgeıde Memleket basshysynyń resmı saparlary barysynda, sondaı-aq túrli álemdik, halyqaralyq saıystarda sportshy saıypqyrandarymyz jeńis tuǵyryna kóterilgende asqaqtaıdy. «Týǵan jerim meniń – Qazaqstanym!» dep Ánuranymyz shyrqalyp, kók týymyz bıikte jelbireıdi. О́zi de elimizdiń beıresmı bir rámizine aınalǵan ánshi Dımashtyń Ánuranymyzdy asqan shabytpen, nurly naqyshpen, bólek mánermen oryndaǵany elim, jerim degen árbir jannyń julyn-júıkesin shymyrlatty.
Aıta ketken jón, kók baıraq tek bási joǵary sport jarystarynda ǵana emes, ǵarysh stansasynda jelbiredi. Ǵaryshqa bir emes, eki ret baryp kelgen, ekinshi saparynda bort komandıri retinde ushqan Talǵat Musabaev ǵarysh stansasynan búkil álemge Memlekettik týymyzdy kóterip turyp, sóz tolǵady. Al 2015 jyly úshinshi qazaq ǵaryshkeri Aıdyn Aıymbetovtiń ushýy barysynda Memlekettik týymyz Jer planetasyn 150 ret aınalyp shyqty. Sonymen qosa kók baıraǵymyz álemniń barlyq qurlyǵynda, onyń ishinde Monblan (4 810 metr), Lenın (7 134 metr), Everest (8 848 metr) syndy álemniń eń bıik shyńdarynda jelbiredi.
Elimizdiń memlekettik rámizderiniń sýretteri otandastarymyzdyń negizgi qujattary, atap aıtqanda, tólqujat, jeke kýálik, týý týraly kýálik, dıplom, attestatta tańbalanǵan. Memlekettik týdy nemese onyń kishkentaı kóshirmesin ózge elge saıahat jasaǵan jıhankez jerlesterimiz, jankúıerlerimiz únemi ózderimen birge alyp júredi. Bul da azamattardyń patrıottyq sezimin nyǵaıtýǵa negiz bolatyn, áser etetin mán-jaılar.
Jalpy, Memlekettik rámizder – eldiktiń, táýelsizdigimizdiń mańyzdy, basty belgisi. Sol sebepti onyń tarıhyn, mán-mańyzyn tereń bilý, keńinen qoldaný, qadir tutý óskeleń urpaq sanasynda patrıotızmdi qalyptastyrý turǵysynan alǵanda da óte ózekti. Memlekettik rámizderimizdi ulyqtaý tek 4 maýsymda emes, jyl-on eki aı boıyna júıeli túrde júrgizilýi kerek.
Táýelsizdigimizdiń altyn kúmbezi sanalatyn memlekettik rámizderimizdiń mártebesi arta bersin. Beıbitshilik pen yntymaqtyń, berekeli eńbek pen jasampazdyqtyń altyn besigi – Otanymyz gúldenip, elimizdiń Memlekettik týy bıikte jelbireı bersin.
