Bul bir qyzyq dúnıe. Táýlik boıy sýǵa salsa da, sý bolmaıdy. Budan jasalǵan kórpe 1 mln dollar turady. Álem boıynsha jylyna nebári 50 kg ǵana satylymǵa shyǵady. Muny tabıǵattyń adamzatqa syılaǵan jylý saqtaǵyshy desek bolady. Mamyqty alý joly da – kúrdeli. Islandııaǵa baryp, Gaga qusynyń uıalarynan jınaý kerek. Qus uıasyn sáýir aıynda, salqyn kezde salady. Urpaǵyn sýyqtan qorǵaý úshin keýdesindegi názik mamyqty julyp, qorshaıdy. 60 uıadan tek 1 kg mamyq jınalady. Nege qymbat ekenin ózińiz oılaı berińiz.
Ýdy ý qaıtarady
Bizdiń túsinigimizde ýly jylan kez kelgen tirshilik ıesine qaýip tóndiredi. Biraq túıe aǵzasy olaı oılamaıdy eken.
Negizi túıeniń keremet ımmýnıteti bar. Vırýstyq aýrýlarǵa, tipti oba nemese aýsyl sııaqty dertterge az shaldyǵady. Degenmen bul janýar aýyratyn elden erek syrqat bar. Uzaq ýaqyt boıy ne shóp jemeı, ne sý ishpeı jatyp alady. Sonda ıesi baıaǵydan qalǵan dástúr boıynsha túıeniń aýzyn ashyp, ýly jylandy salyp jiberedi. Jylandy ýymen qatar jegende, túıeniń dene temperatýrasy kóterilip, qyzyq úderis júredi. Túıe terlep, birden as-sý ishe bastaıdy. Tolyq zerttelmegenimen, arab halqy osy ádisti áli kúnge deıin qoldanady.
Jyldam alpınıst
Nepal turǵyny Phýndjo Djhangmý Lama Everestegi eń jyldam alpınıst ataǵyn aldy.
Ol 8849 metr bıiktikti 14 saǵat 31 mınýtta baǵyndyrdy. Álemdik rekordty jańartty. Bul týraly «the Himalayan Times» basylymy habarlady. Alpınıst 22 mamyrda tústen keıin taýǵa kóterilip, ertesi tańerteń órmeleýdi aıaqtaǵan. Phýndjo buǵan deıin de rekordtyq kórsetkishke qol jetkizip, 2018 jyly Everest shyńyn 39 saǵat 6 mınýtta baǵyndyrǵan. Ol Nepaldyń Shveısarııa Alpisi men Gımalaı taýlarynda órmeleý jattyǵýlarynan ótip, daıyndalady.
