Jańa jeliniń ashylý saltanatyna oblys ákimi Qumar Aqsaqalov, Belarýs Respýblıkasynyń ónerkásip mınıstri Aleksandr Rogojnık, atalǵan eldiń Qazaqstandaǵy tótenshe jáne ýákiletti elshisi Pavel Ýtıýpın, «MTZ» AAQ bas dırektory Vıtalıı Vovk, sondaı-aq eki eldiń birneshe salalyq mınıstrliginiń ókilderi qatysty. Jıynda jańa sehtyń ashylýy elimizdiń ónerkásip salasyndaǵy eleýli oqıǵa ekeni, zaýyt budan bylaı óndiristiń jergilikti úlesin birte-birte arttyra beretini aıtyldy. Buǵan deıin syrttan túgeldeı bólshek túrinde keletin áıgili traktordyń birsypara bólshegi az ýaqyttan soń Qostanaıda jasalatyn bolady. Mamandardyń aıtýynsha, traktordyń kabınasy jalpy óndiristiń 40 paıyzyn quraıdy. Al úshinshi, tórtinshi kezeńde bólshek óndirisindegi jergilikti qamtý úlesin barynsha arttyrý maqsaty tur.
«О́ndiristiń kelesi kezeńderin júzege asyrý múmkindigi jan-jaqty talqylanyp, ábden pysyqtaldy. Bolashaqta traktordyń aldyńǵy beldemesin, jekelegen plastık buıymdaryn, basqa da bólshekterdi osynda shyǵarsaq deımiz. Qozǵaltqysh blogin de jasaýǵa múmkindik bar. Bıyl shoıyn quıatyn zaýyt ashylsa, mashınalardyń qandaı túrine de sapaly qozǵaltqysh blogin daıyndap bere alamyz», dedi oblys ákimi Qumar Aqsaqalov.
Aýmaǵy 10 jarym myń sharshy metr bolatyn óndiris alańynda alty birdeı qural-jabdyq ýchaskesi jumys istep tur. Zamanaýı lazerli stanok, temir ıetin apparat, eki robot kesheni jáne avtomattandyrylǵan boıaý kamerasy bar. Jeliniń boıynan «Belarýs» traktorynyń 9 túrine arnalǵan kópfýnksııaly ámbebap kabınalar shyǵarylady.
«Jańa jeli óndiris qýatyna tolyq kóshse, jylyna 10 myń kabına shyǵarýǵa múmkindik bar. Bul mejege biz 2026 jyly jetemiz. Odan bólek, qazirdiń ózinde traktordyń joǵary qysymdy bólshegin, kabınanyń aıaqbasqyshyn ózimiz jasap jatyrmyz. Keleshekte basqa da mańyzdy bólshekterdi óndirýdi qolǵa alamyz», deıdi «MTZ-Qazaqstan mashına jasaý zaýyty» JShS bas dırektory Valentın Dashkevıch.
«Belarýstyń» Qostanaıǵa yqylasy aýyp otyrǵany tegin emes. Birinshiden, keıingi jyldary óńirde mashına jasaý salasy qarqyndy damyp keledi. Ekinshiden, oblysta ınvestısııalyq ahýal óte qolaıly.
«Qostanaı oblysy logıstıkalyq ornalasýy jaǵynan da asa tıimdi. Bul alańdy eksport kózi dep bilemiz. Tek traktordy emes, kombaın, órt sóndirý mashınalary sııaqty tehnıkalardy da osynda qurastyryp, jınaý oıymyzda bar. Qazaqstan men Belarýs arasyndaǵy taýar aınalymy jyldan-jylǵa artyp keledi. Qazir ol mıllıard dollardan asty. Onyń ishinde, ásirese, ónerkásiptik kooperasııa jaqsy damyǵan», deıdi Belarýs Respýblıkasynyń ónerkásip mınıstri Aleksandr Rogojnık.
Indýstrııalyq damý komıtetiniń tóraǵasy Azamat Panbaevtyń aıtýynsha, búginde Qazaqstan men Belarýs Respbýlıkasy jalpy quny 85 mln dollar bolatyn birlesken toǵyz jobany qolǵa alyp otyr. Sonyń jeteýi tolyqtaı iske asyrylǵan.
«Jobalar negizinen mashına jasaý salasyna qatysty. Máselen, traktor zaýytyn iske qosýǵa 7,5 mıllıard teńge tikeleı ınvestısııa salyndy. Onyń óndiris qýaty artqan saıyn, salyq túsimi de eselene beredi. Bul kásiporynnyń bıýdjetke tólemi shamamen tórt ese ulǵaıady degen boljam bar», deıdi komıtet tóraǵasy.
Búginde elimizde «Belarýs» traktorlaryn qurastyratyn 3 kásiporyn jumys isteıdi. Mamandar jańa seh óndiristi lokalızasııalaýǵa jáne tutynýshy úshin ónim qunyn tómendetýge úlken múmkindik beredi dep otyr. Qostanaıda shyǵarylǵan kabınalar otandyq óndiriste paıdalanylady. Sonymen qatar dál osyndaı traktor shyǵaryp jatqan «QazAgroInnovasııalyqKorporasııa» jáne «SemAZ» kompanııalaryna jiberiletin bolady.
«Kezinde eki birdeı keńsharda biraz jyl bas ınjener bolyp jumys istedim. «Belarýs» traktorlarynyń óte senimdi tehnıka ekenine sol jyldardaǵy eńbek tájirıbemde kóz jetkizdim. Jańa óndiris orny oblys ekonomıkasynyń damýyna úlken serpin ákeledi. Bul traktorlar bizdiń egin alqaptarymyzda burynnan jumys istep jatyr. О́zin óte senimdi tehnıka retinde kórsetti. Keıingi 30 jyldyń ishinde «Belarýs» traktorlary edáýir jetildirildi. Zaýyttyń únemi sapa máselesin birinshi kezekke qoıatyny qýantady. Muny osy traktordyń ıgiligin kórip jatqan jergilikti sharýalar da rastap beredi. Sondyqtan biz oblys bıýdjeti esebinen bul zaýytty elektr energııasy, gaz, sý, basqa da kommýnıkasııa qajettiligimen qamtamasyz etip, úlken qoldaý kórsettik. Infraqurylymǵa jumsalǵan shyǵyn memlekettik salyq túsimi retinde eselenip qaıtady», deıdi oblys ákimi Qumar Aqsaqalov.
Zaýyt «Belarýs» traktorlarynyń 11-den bastalyp, 364 at kúshine deıin teń keletin 20 túrin shyǵarady. Jalpy, «MTZ-Qazaqstan mashına jasaý» seriktestiginde jylyna 3 myń traktor qurastyrý kózdelgen.
Saltanatty is-sharadan keıin taraptar birqatar ekijaqty tıimdi kelisimsharttarǵa qol qoıdy. Qol qoıý rásimi barysynda endi Mirjaqyp Dýlatuly atyndaǵy Qostanaı ınjenerlik-ekonomıkalyq ýnıversıtetiniń stýdentteri «MTZ-Qazaqstan» zaýytynda tájirıbeden ótetini aıtyldy. Aıtpaqshy, Mınskiden kelgen «MTZ» AAQ basshylary oblys ákimine konveıerden jańa shyqqan «Belarýs» traktoryn tartý etti. Sý jańa qýatty tehnıka Qostanaıdaǵy oqý oryndarynyń birine beriletin bolady.
Qostanaı oblysy
