Foto:qr-pib.kz
Arǵynbekovanyń aıtýynsha, bul iste molekýlalyq dıagnostıka tehnologııasy, onyń ishinde kompıýterlik tomografııasy bar pozıtrondy-emıssııalyq tomografııa mańyzdy ról atqarady. Olar patologııalyq oshaqtarda jınalatyn mamandandyrylǵan jabdyqtar men radıofarmasevtıkalyq dárilik preparattardyń (RFDP) arqasynda aýrýlardyń órshýin anyqtaýǵa jáne baqylaýǵa múmkindik beredi.
«Álemde 100-den astam radıofarmasevtıkalyq dárilik preparattar tirkelgen, biraq Qazaqstanda olardyń tek ekeýi ǵana bar, bul tirkeý jáne lısenzııalaý isindegi shekteýlerge baılanysty. Bul jaǵdaı, bir jaǵynan bizdegi ótkizý naryǵynyń azdyǵyna, ekinshi jaǵynan, radıofarmasevtıkalyq dárilik preparattardy tirkeý jáne radıonýklıdtik dıagnostıka qyzmetin lısenzııalaý isiniń tym kúrdeli rásimine baılanysty. Osynyń bári, ıadrolyq medısına qaryshtap damyp bara jatqan búkil álemnen aıyrmashylyǵy, bizde keshendi túrde qaraǵanda, sońǵy onjyldyqta radıonýklıdtik dıagnostıka qyzmetiniń sany men aıasy ózgerissiz qalyp otyr. Kópten beri jańa preparattar da jasalǵan joq», dedi senator.
Senator elimizdegi pasıentterdiń jyldam saýyǵýy men qyzmet kórsetý múmkindigin shekteıtin uzaq jáne qymbat tirkeý prosesine nazar aýdardy. Mysaly, qazirgi ýaqytta sıklotronnyń buzylýy jáne tirkelgen RFDP-nyń bolmaýy nátıjesinde syrqattardy zertteý toqtatylady, bul medısınalyq kómekke muqtaj kóptegen adamdarǵa kezek pen kútý ýaqytynyń kóbeıýine ákeletinin aıta ketti.
«Osy problemalardy joıý úshin ıadrolyq medısına ortalyqtaryna radıofarmasevtıkalyq dárilik preparattardy memlekettik tirkeý jáne saraptaý qaǵıdalaryn halyqaralyq medısınalyq praktıkada jaqsy zerttelgen preparattardy tirkeýdi jedeldetý jáne ýltra qysqa ómir súretin radıofarmpreparattarǵa arnalǵan ulttyq rásim aıasynda saraptama júrgizý jóninde ózgertý qajet dep sanaımyn», dep qosty Aınur Arǵynbekova.
Qyrmyzy JUMAǴALIQYZY,
EUÝ stýdenti
