Foto: avtordan
Jańartylǵan stadıonnyń saltanatty ashylýyna QazUÝ basqarma tóraǵasy-rektor Janseıit Túımebaev jańartylǵan sporttyq nysannyń oqytýshylar men stýdentterdiń densaýlyǵy úshin mańyzdylyǵyn atap ótti.
«QazUÝ stadıony 1986 jyly salynǵan bolatyn. Búginde Ortalyq Azııadaǵy biregeı ýnıversıtettik sport alańy retinde QazUÝ qurylysynyń II kezeńi aıasynda jańartyldy. Joǵary sapadaǵy, zamanaýı úlgidegi stadıon ÝEFA men FIFA uıymdarynyń halyqaralyq talaptaryna saı jasalǵan. Fýtbol alańynyń jasandy jabyndysy men drenaj júıesi álemdegi Top-3, Ortalyq Azııadaǵy Top-1 talabyna sáıkes keledi. Úsh myń oryndyq kórermen trıbýnasy, kıim aýystyratyn bólme, jýynatyn oryndar sońǵy úlgide jabdyqtalǵan. Sportpen shuǵyldanýshy jastarǵa jan-jaqty jaǵdaı jasalǵan, osy stadıonda álem chempıondary jattyǵyp, jańa rekordtar jasaıtynyna senimdimin», dedi rektor óz sózinde.
Stadıonda fýtbol alańynan bólek, júgirý jolaqtary, velosıpedshilerge jáne jaıaý júrginshilerge arnalǵan jol, trenajerlar abattandyrylǵan ári jańa úlgidegi jaryq beretin úlken shamdar ornatylǵan alańnyń sánin keltirip tur.
Saltanatty ashylý rásiminen soń oqytýshylar men sportshy jastardyń qatysýymen fýtboldan joldastyq kezdesý ótti.
