Oblys prokýrory Berik Ábilov óńirdiń biregeı tabıǵı resýrstar men bıoalýantúrlilikke baı ekenin, biraq, ókinishke qaraı, osynshama ıen baılyqqa zańsyz qol suqqan suǵanaq kóz sur mergenderdiń kóbeıip bara jatqany alańdatyp otyrǵanyn tilge tıek etti. Prokýrordyń aıtýynsha, janýarlar álemi memlekettiń qorǵaýynda bolǵanyna qaramastan, sońǵy jyldary aımaqta brakonerlik jaǵdaılar jıilep ketken. Sońǵy 3 jyl ishinde óńirde janýarlar dúnıesin paıdalaný talaptary men ań aýlaý erejelerin buzǵany úshin ákimshilik jaýapkershilikke tartylǵandar qatary 17 paıyzǵa ósip otyr. Máselen, 2021 jyly 392 adam tabıǵat baılyǵyna zańsyz qol suqqany úshin jazalansa, 2022 jyly 423, al 2023 jyly 459 qaskóı ákimshilik jaýapkershilikke tartylǵan.
«Qyzyl kitapqa» engen, onsyz da joıylyp bara jatqan sırek kezdesetin janýarlardy zańsyz aýlaǵany jáne zańsyz ustaǵany úshin 43 qylmystyq is tirkeldi, onyń 20-sy sotqa jiberildi», dedi oblys prokýrory.
Mysaly, 2023 jylǵy 22 jeltoqsanda polısııa qyzmetkerleri Áýlıekól tas jolynyń Qostanaı qalasyna jaqyn tusynda jolaýshy tasymaldaıtyn shaǵyn avtobýsty toqtatady. Kólikti tekserý barysynda quny 2,1 mlrd teńge bolatyn 300 kıik múıizi tabylǵan. Qazirgi tańda atalǵan derek boıynsha qozǵalǵan tergeý jumystary aıaqtalyp, qylmystyq is sotqa jiberildi.
Jıyn barysynda óńirdegi ańshylyq sharýashylyqtarynyń janýarlar dúnıesin qorǵaý, olardyń sanyn kóbeıtý jáne paıdalaný máseleleri týrasynda sóz boldy. Osy baǵytta júrgizilip jatqan jumysty úılestirý jáne tıimdiligin arttyrý aıasynda brakonerlikke qarsy is-qımyl jospary bekitildi, shekara mańyndaǵy ótkizý pýnktterinde janýarlar dúnıesi nysandary men tyıym salynǵan quraldar, aýlaý quraldarynyń kontrabandasy faktilerine jol bermeý jóninde ózara is-qımyl algorıtmi aıqyndaldy.
Úılestirý keńesiniń otyrysynda, sonymen qatar, jer kólemi jóninen elimizde altynshy orynda turǵan ulan-ǵaıyr óńirdiń orman alqaptaryn órtten saqtaý baǵytynda atqarylyp jatqan is-sharalar, osy saladaǵy ózekti máseleler talqylandy.
Oblys prokýrory orman alqaptarynyń qaýipsizdigi Qazaqstan Respýblıkasy Bas Prokýrorynyń tikeleı baqylaýynda ekenin, taıaýda tabıǵat baılyǵyn qorǵaýmen aınalysatyn barlyq orman mekemeleriniń jumysyna taldaý júrgizilgenin atap ótti.
Jıynǵa qatysýshylar 2022 jyldyń qyrkúıek aıynda órtke oranǵan Áýlıekól aýdanyndaǵy orman alqabynyń qazirgi jaǵdaıyn sóz etip, Amanqaraǵaı ormanyn saýyqtyrý barysynda zańsyz aǵash kesýge jol bermeý, memleketke keltirilgen zalaldy óteý sharalaryn talqylady. Sonymen qatar, úılestirý keńesinde ormanǵa jaqyn ornalasqan eldi mekender men turǵyn úılerdiń órt qaýipsizdigine daıyndyǵyn arttyrýǵa baǵyttalǵan qosymsha sharalar qabyldandy.
Qostanaı oblysy
