Foto: primeminister.kz
Premer-mınıstr sapar aıasynda aımaqtaǵy sý tasqynynan zardap shekkenderge salynyp jatqan úılerdiń sapasyn tekserdi.
Ol Petropavl qalasyndaǵy Birlik yqsham aýdanynda jańadan boı kótergen úıdi aralap, jańa baspana kiltin alǵan otbasy múshelerimen de áńgimelesti. Oljas Bektenov aýqymdy sý tasqynynyń saldaryn joıýda túsinistik tanytyp, kómekteskeni úshin turǵyndarǵa alǵysyn bildirdi.
«Prezıdent Qasym-Jomart Toqaev sý tasqynynan zardap shekken azamattardyń barlyǵynyń baspanasyn qalpyna keltirý máselesin erekshe baqylaýda ustap otyr. Soltústik Qazaqstan oblysy qaladaǵy sý basqan yqsham aýdandardaǵy úılerdiń qurylysyn alǵashqylardyń biri bolyp aıaqtady. Bizdiń basty mindetimiz – zardap shekkenderdiń barlyǵyn sýyq túskenge deıin úılerine kóshirý», dedi Oljas Bektenov.
Úkimet basshysy ákimdikke salynyp jatqan úılerdiń mańyn abattandyrýdy qosa tapsyrdy.
О́ńirde barlyǵy 700 úı men 90 oryndyq balabaqsha salynyp jatyr. Jaqynda ǵana otbasylarǵa 53 úıdiń kilti berildi. Maýsym aıynyń sońyna deıin taǵy 47 úı berý josparlansa, 600 úıdiń qurylysy bıylǵy tamyz aıynyń sońyna deıin aıaqtalady dep josparlanǵan.
Sondaı-aq sapar barysynda Oljas Bektenov qalpyna keltirýge bolatyn úılerdi jóndeý jumystarymen tanysty. Soltústik Qazaqstan oblysy – sý tasqyny saldaryn joıýǵa mehanıkalandyrylǵan brıgadalar tartylǵan jalǵyz óńir. Máselen, tek Oıqala yqsham aýdanynda 1 133 úı sý basý aımaǵynda boldy, onyń 309-y jóndeýdi qajet etedi. Jumystardy 24 mehbrıgada kezeń-kezeńimen oryndap jatyr, Petropavl boıynsha osyndaı 85 qurama bar.
