Qarýlastary men komandırlerdiń, sondaı-aq ata-analarynyń qatysýymen ótken is-sharada jas jaýyngerler Otanyn qorǵaýǵa, áskerı qyzmettiń aýyrtpalyqtaryn tabandylyqpen kóterýge, Qazaqstan halqy men onyń zańdy saılanǵan Prezıdentine adal bolýǵa ant berdi.
– Áskerı anttaǵy ár sóz úlken maǵynaǵa ıe. Ony saltanatty jaǵdaıda oqyǵan soń ǵana áskerge shaqyrylýshy tolyqqandy áskerı qyzmetshige aınalady. Sol arqyly áskerı qyzmetti durys atqarý men antqa adal bolý jaýapkershiligin óz moınyna alady, – dep atap ótti «Ońtústik» óńirlik áskerleri qolbasshysynyń tárbıe jáne ıdeologııalyq jumystar jónindegi orynbasary, polkovnık Oraz Kýchýkov.
Ant berý rásimine taý qoryqshysy polkiniń sarbazdary bir aı boıy daıyndaldy. Osy ýaqyt ishinde olar áskerı ómir saltymen, polk tarıhymen tanysyp, jas jaýynger kýrsyn ıgerdi. Jalpy, áskerı jarǵylardy, qarýdyń taktıkalyq-tehnıkalyq sıpattamalaryn zerdelep, saptyq, atys jáne dene daıyndyǵynan ótti.
– Men qyzmet etýge kelgen áskerı bólim elimizdegi biregeı bólim ári halyq batyry Baýyrjan Momyshulynyń týǵan jerinde ornalasqan. Bul bizge qosymsha jaýapkershilik júkteıdi. Sol sebepti, uly qolbasshynyń esimi men dańqyna saı bolýymyz kerek, – dedi Shymkentten shaqyrylǵan qatardaǵy jaýynger Ramazan Aıdosuly.
Taý qoryqshysy polki tabıǵaty kórkem Terisbulaq sý qoımasynyń jaǵasynda, taý jotasynyń eteginde ornalasqan.
– Maǵan bul ólkeniń tabıǵaty qatty unady. Aınalanyń bári tamasha. Ár tań saıyn kóńil kúıim kóterilip oıanamyn, – deıdi О́skemen qalasynan qyzmet etýge kelgen merzimdi qyzmettegi qatardaǵy jaýynger Danıl Enıkýshkın. – Shynymdy aıtsam, men qazirdiń ózinde kelisimshart boıynsha osynda qyzmet etýdi oılastyryp jatyrmyn. Árıne, ony ýaqyt kórsetedi.
«Ońtústik» óńirlik qolbasshylyǵy áskerı orkestriniń oryndaýyndaǵy áskerı marshtar saltanatqa qatysýshylardyń jaýyngerlik rýhy men kóńil kúıin kóterip tastady. Sarbazdardyń ata-analary úshin qarý-jaraq pen áskerı-tehnıkalyq múlik kórmesi uıymdastyrylyp, áskerı bólim aýmaǵynda ekskýrsııa júrgizildi.
