Oblystyq bilim basqarmasy basshysynyń orynbasary Nurgúl Bertileýovanyń aıtýynsha, óńirdegi memlekettik «Kúnshýaq» jáne «Álııa» lagerlerinde az qamtylǵan, kópbalaly otbasylar men sý tasqynynan zardap shekken turǵyndardyń balalary úshin tegin joldama bólindi. Máselen, jaz boıy «Kúnshýaq» lageri 606 balany qabyldaýǵa daıar. Bul jerde densaýlyǵynda kináraty bar balalardyń tynyǵýyna erekshe jaǵdaı jasalǵan. Ásirese sal aýrýyna shaldyqqan balalar «Kúnshýaqqa» kelýge qushtar. О́ıtkeni munda erekshe qajettiligi bar balalardy atpen serýendetedi. Oǵan qosa lager aýlasyndaǵy gúlderdi, baqshadaǵy kókónisterdi balalar ózderi kútip baptaıdy. Maýsymnyń basynda Qobda aýdanynyń Egindibulaq eldi mekeniniń janyndaǵy «Álııa» lageri esigin ashty. Ázirshe osy jańa demalys ornyna tórt maýsymǵa 288 oqýshy qabyldanady. Egindibulaqtaǵy lager kestesi sporttyq, patrıottyq jáne shyǵarmashylyq baǵyttarǵa bólingen. О́ńirde balalardy saýyqtyratyn ortalyqtardyń tapshylyǵy týraly kópten beri másele kóterilip júr. Sol olqylyqtyń ornyn «Álııa» lageri toltyrmaqshy. Bul áýelgide múgedektigi bar eresek adamdardy tabıǵat arasynda saýyqtyratyn ortalyq retinde salyna bastap, aǵashtan qıyp salynǵan birneshe úı men ashanasy boı kóterip, aýlasy qorshaldy. Alaıda aýyldan alys, ınfraqurylymy joq jerde salynǵandyqtan, naýqastardyń turýyna qolaısyzdyq týdyrdy. Sodan keıin sportshylardyń qys mezgilinde oqý-jattyǵý ornyna aınaldyrý týraly usynys tústi. Biraq ne gaz, ne aýyzsýy tartylmaǵandyqtan, qys pen kúzgi ýaqytta adamdardy qabyldaýǵa múmkindik bolmady. Aqyry qurylys oqýshylar lagerine aınalyp, oblystyq sport basqarmasynan bilim basqarmasynyń menshigine kóshirilip jatyr.
Úsh aı jazǵy demalys kezinde Aqtóbe oblysynda «Shuǵyla» (alty maýsymǵa 1 800 bala), «Ásem» (alty maýsymǵa 1 800 bala), «Sampit» (7 maýsymǵa 2 100 bala), «Kókjar-Báıterek» (3 maýsymǵa 270 oqýshy), «Muǵaljar» (4 maýsymǵa 1 360 bala) jekemenshik lagerleri jumys isteıdi. Elek jáne Qarǵaly ózenderine taıaý, tabıǵat arasynda ornalasqan osy lagerlerge satylatyn joldama 10-12 kúnge shamamen 80-110 myń teńgeni quraıdy. Lager joldamasyn ata-ana jeke qarajatyna, ne ózderi jumys isteıtin óndiris oryndarynyń kásipodaq uıymynan jarty baǵasyna satyp alady. Mundaı múmkindigi joq ata-analarǵa «Qazaqstan halqyna» qory kómekke kelip, bıylǵy jazda elimizdegi 1 147 aýyl balasyn tegin demalyspen qamtýdy josparlap otyr. «Qazaqstan halqyna» qorynyń joldamasyna kópbalaly, turmystyq jaǵdaıy tómen otbasy balalarymen birge shyǵarmashylyq, zııatkerlik saıystarda úzdik shyqqan órender de ıe bolmaqshy.
Aqtóbe oblysy
