«Jasyl el» eńbek jasaǵynyń 100-ge jýyq múshesi sýqoımasy men ózen jaǵalaýlarynan 150 tonna qoqys jınap, qalalyq polıgonǵa aparyp tókti. Munymen bir kezde eńbek jasaǵynyń bir top múshesi qaladaǵy «Ǵashyqtar alleıasyn» tazartyp, osy jerden 40 tonna qoqys shyǵardy.
Úsh ózenniń boıynda birneshe qoǵamdyq jaǵajaı bar. Bul jerlerge sýǵa túsýge kelgen aǵaıyn tamaq qaldyqtaryn, plastık qutylardy tastap ketedi. Jazdaı, qystaı jınalǵan turmystyq qaldyqtar kóktemde sý kelgende tóńirekti túgel lastaıdy. Onyń ústine, bıylǵy sý tasqynynan keıin tal-terektiń arasy qýraǵan shópter men synǵan butaqtarǵa tolyp qaldy. Qýraǵan shóp pen qoqys kún ysyǵanda órttiń shyǵýyna sebepshi.
«Jasyl el» jastar eńbek jasaqtary oblystyq shtaby jáne «Atameken» stýdenttik otrıadtar birlestiginiń tóraǵasy Nurjan Shańǵytbaevtyń aıtýynsha, bıyl «Jasyl el» jasaǵyna 1860 jasty jumyspen qamtý josparlanyp otyr. Olar abattandyrý, kógaldandyrý jáne qurylys otrıadtarynda bir aı eńbek etip, 130-160 myń teńge aralyǵynda jalaqy alady.
«Sý tasqynyna baılanysty bıyl jumysty erte bastadyq. Eńbek jasaǵyna sáýir aıynda oblys ortalyǵynan 38 jumyssyz jas tartylyp, olar tasqynnan zardap shekken zeınetkerler úılerin tazartýǵa kómektesti. Úsh aıdan beri «Taza qala», «Taza jaǵalaý» aksııasy aıasynda qala kósheleri, ózen jaǵalaýlary, qaraýsyz qalǵan qoǵamdyq jaǵajaılardy tazartý jumystary belsendi júrgizilip jatyr. Eńbek jasaǵy músheleriniń taǵy bir toby qazirgi ýaqytta kóshetterdi kútip-baptaıdy jáne kógaldandyrý jumystarymen aınalysady. Sáýir, mamyr, naýryz aılarynda «Jasyl elde» 918 jas jumys istese, shilde aıynda 596 bala qabyldanady.
Eńbek jasaǵynda abattandyrý, kógaldandyrý jáne qurylys salasy boıynsha birneshe shaǵyn jasaq quryldy. Kógaldandyrý jumystaryna tartylǵandar orman sharýashylyǵy mekemelerine qarasty tálimbaqtarda jumys istep, 130 myń teńge jalaqy alady. Abattandyrý baǵyty tazalyq jumystaryn qamtıdy. Senbilikke belsendi shyǵyp jatqan osy jasaq quramyndaǵy balalar. Bul jerde eńbek etetinder 150 myń teńge jalaqy alsa, qurylys jumystaryna tartylǵandar 160 myń teńge alady. Biraq qurylysqa 18 jastan asqandardy alamyz», deıdi «Jasyl el» jastar eńbek jasaqtary oblystyq shtab jetekshisi Nurjan Shańǵytbaev.
«Jasyl el» jasaǵyna 16-35 jas arasyndaǵy kez kelgen adam múshe bola alady. Onyń quramynda mekteptiń joǵary synyp oqýshylary, jumyssyz jastar, JOO jáne orta arnaýly kásiptik oqý oryndary stýdentteri bar. Bir ereksheligi, bir bala bir aı ǵana eńbek etedi. «Jasyl el» qataryna jazylǵysy keletin balalar sany óte kóp bolǵandyqtan, eńbek etkisi kelgen bar balaǵa múmkindik berý kerek.
Búginde sý tasqynynan zardap shekken turǵyndarǵa Áıteke bı, Oıyl, Qobda, Temir aýdandarynda baspana qurylystary bastaldy. «Jasyl el» jasaǵynyń bir brıgadasy qazir Oıyl aýdanyndaǵy qurylysta júr. Oblys ortalyǵynda úılerin sý basqan turǵyndar úshin ázirshe qurylys bastalǵan joq. Eger qurylys qazyǵy qadalsa, kómekke «Jasyl el» eńbek jasaǵynyń bir brıgadasy ázir tur.
«Taza Qazaqstan» respýblıkalyq aksııasy aıasynda elimizde ótip jatqan senbilikterge Aqtóbe oblysynyń aýyl turǵyndary osylaısha belsendi qatysyp jatyr. О́tken senbilikke bir mezgilde myńnan astam aqtóbeliktiń shyǵýy týǵan jeriniń tabıǵatyna beıjaı qaramaıtyndardyń kóp ekendigin kórsetedi. Aıta keterlik bir másele – adamdarymyz qoqysty kóshege tastamaý mádenıetin boılaryna sińirse, ár apta saıyn qaladan da, daladan da tonna-tonna qoqys shyqpas edi.
Aqtóbe oblysy
