Eki kúnge sozylǵan bilimdiler báıgesinde «Erýdıt» komandasy jeńiske jetti. Intellektýaldy saıystyń fınaldyq kezeńine oblys ákiminiń orynbasary Beısenbaı Tájibaev, Mádenıet jáne aqparat mınıstrligi Jastar jáne otbasy isteri komıteti tóraǵasynyń orynbasary Birjan Álimjanov qatysyp, jeńimpaz atanǵan jastardy marapattady. «Naǵyz bilimge qushtar, únemi izdenis jolynda júretin jastardyń basyn biriktiretin respýblıkalyq deńgeıdegi ıntellektýaldy saıystardyń bizdiń óńirimizde ótip jatqandyǵy kóńil qýantady. «Bilekti birdi jyǵar, bilimdi myńdy jyǵar» degendeı, saıysqa qatysyp óz baqtaryn synaǵan barlyq komandaǵa alǵys aıtamyn», dedi oblys ákiminiń orynbasary.
Daryndy jastardy qoldaý, olardyń tanymdyq qyzyǵýshylyqtaryn oıatý arqyly bilim deńgeıin kóterý, sondaı-aq ıntellektýaldy ortany qalyptastyrý, jastar arasynda sheshendik mádenıetti, toleranttylyq tártippen azamattyq tanymdy damytý maqsatyndaǵy bul saıysqa 100-ge jýyq komanda ótinim bergen. Onyń ishinde Túrkistan oblysynan bólek, Astana, Almaty, Shymkent qalalary men Jambyl, Pavlodar jáne Qyzylorda oblystarynan da komandalar bar. Jalpy, 72 komanda arasynan shırek fınalǵa 12 komanda shyqty. Olardyń tórteýi fınaldyq kezeńniń joldamasyn sarapqa salyp, nátıjesinde, birinshi oryndy Saıram aýdanynyń «Erýdıt» komandasy jeńip aldy. Al ekinshi oryndy Jambyl oblysynan kelgen «Chicago bulls» komandasy alsa, úshinshi oryn báıdibektik «BBC» komandasyna buıyrdy. Jeńimpaz komandaǵa 1000 000 teńge, II orynǵa 500 000 teńge jáne III oryn ıegerlerine 300 000 teńge qarjylaı syılyq tabys etildi. Sondaı-aq saıysqa qatysqan komandalar arasynda «Úzdik ujym», «Úzdik bilimger», «Úzdik top basshy», «Úzdik jaýap», «Úzdik kıim úlgisi» atalymdary boıynsha úzdikter de marapattaldy.
TÚRKISTAN
