Foto: gov.kz
Bes birdeı shet memleketti toǵystyryp turǵan teńizdiń tylsymy kóp, teńizishilik túrli aǵystar men uıyqtar, ıirimder týraly eshkim, ıaǵnı ǵylym naqty esh derek bere alǵan joq. Áıtse de jaǵalaýdaǵy shomylýǵa qaýipti aımaqtarda sýǵa túspeýdi jáne qaýipsizdik erejelerin qatań saqtaýdy quzyrly oryndar – Tótenshe jaǵdaılar basqarmasy jaz bastalysymen jar sala aıtyp, teńiz jaǵasyndaǵy demalýshylar arasyna baryp, áleýmettik jelilerde tynbaı jarnama jasap saqtandyrǵanmen, dál sol qaýipti aımaqtarǵa baryp shomylatyndar jáne qaıǵyly jaǵdaıǵa ushyraıtyndar sany azaımaı keledi.
Aqtaý qalasy aýmaǵynda uzyndyǵy 100 metr jáne eni 20 metrge sozylǵan Shora sý kanaly, 4-shaǵyn aýdanda ornalasqan «Caspian Riviera Grand Palace» qonaqúıinen bastap 5-shaǵyn aýdandaǵy Taras Shevchenko eskertkishinen tómen túsý baǵytyna qaraı uzyndyǵy 300 metr jáne eni 20 metr jaǵalaý aımaǵy men uzyndyǵy 3 800 metr jáne eni 120 metr MAEK JShS-nyń sý kanalynyń jaǵalaý aımaǵy sýǵa túsýge ruqsat etilmegen oryndar retinde belgili. Bul tustarda arnaıy belgiler de bar, áıtse de dál osy oryndarǵa kelip qıyn jaǵdaıǵa tap bolyp nemese ajal qushyp jatatyndardyń áreketi túsiniksiz. Qazaqta aıtylatyn «ajal aıdaıdy» degen osy bola ma dep oıǵa qalasyń...
Ruqsat etilmegen qaýipti oryndarda sýǵa túsetinder kóbine qaýipti oryndar týraly habarlamaǵa qanyq jergilikti turǵyndar ekendigi de tańdandyrady. Mysaly, Aqtaýda shomylýǵa tyıym salynǵan jerlerde keıingi 5 jylda 16 adam qaza tapqan. Al jyl basynan beri sýǵa túsýge tyıym salynǵan orynda bir adam qaıtys boldy.
«Sýdaǵy qaýipsizdiktiń birqatar erejeleri bar. Atap aıtqanda, shomylýǵa jabdyqtalmaǵan jerlerde sýǵa túspeý, mas kúıde shomylmaý, balalardy shomylý oryndarynda qaraýsyz qaldyrmaý qajet. Sondaı-aq jaǵadan alys júzýge, tyıym salynǵan jerlerde shomylýǵa bolmaıdy. Bul qarapaıym erejeler sizdiń jáne jaqyndaryńyzdyń jazǵy demalysty qaýipsiz ótkizýine kómektesedi. Tótenshe jaǵdaılar basqarmasy qala turǵyndary men qonaqtarynan qaýipsizdik erejelerin qatań saqtaýdy suraıdy», dedi Aqtaý qalalyq tótenshe jaǵdaılar basqarmasy azamattyq qorǵanys tobynyń ofıseri Azamat Tólegenov.
A.Tólegenov aýzyn jıǵansha sýǵa túsýge tyıym salynǵan Shora kanalynda qaıǵyly jaǵdaı boldy. Shomylýǵa barǵan ákeli-balaly ekeýdiń jandármen ákesi qutqarylyp, uly sýǵa batyp ketti. Dál osy qarsańda Mańǵystaýda teńizge batyp bara jatqan áıel qutqaryldy.
Sý – tilsiz jaý, sondyqtan júzý bilmegen jannyń jaǵadan uzamaǵany jón, alaıda demalýshylar bul qarapaıym mysaldy buzyp ótip, teńizdiń tereńine qaraı umtylatynyn qaıtersiń.
Jaz bastaldy, teńiz alǵashqy qurbandaryn jutyp úlgerdi. Jaz demalysy jaqsy-aq, biraq turǵyndar men qonaqtardyń sý mańynda saqtyqty umytpaǵany durys bolar edi.
Mańǵystaý oblysy
