Sýretterdi túsirgen – Erlan OMAR, «EQ»
Ádette, qala tazalyǵy – barlyǵymyzǵa ortaq. Muny kez kelgen adam túsinetini anyq. Otyrǵan ornymyz nemese aýlamyzdan bólek, kóshe tazalyǵyn saqtaý da úlken jaýapkershilik. Biz biletindeı, tazalyqqa jaýapty mekemeler adamdarmen qatar, túrli tehnıka kómegine júginedi.
Ári olardyń atqaratyn mindeti de ártúrli. Biri qys aıynda qar tazalaıdy, taıǵaq boldyrmaý úshin tuzdy qum sebedi, endi biri jaz aıynda jol ústin sypyryp, shań basý úshin sý shashady. Endi biriniń júgi tipten aýyr: aıtyp otyrǵan kóligimiz qala ishindegi shaǵyn aýdandardy tynymsyz sharlap, belgilengen jerdegi qoqys jáshikterin bosatyp jatady. Durysy, ondaǵy siz ben biz tastaǵan túrli qaldyqty óz býnkerine nyǵyzdaı tıep, qala syrtyndaǵy arnaıy orynǵa aparyp tógedi. Bul jumystyń kúndelikti, táýlik boıy damylsyz júretinin kóbimiz baıqaı da bermeımiz. Al joǵaryda aıtyp ketken «STAHLBAU» seriktestigi ıtalııalyq «IVECO» kompanııasymen birlese otyryp, jylyna 100-ge jýyq dál osyndaı «tazalyqshy» júk kóligin tapsyryspen qurastyryp keledi.
«Qoqys tasýǵa nemese jalpy tazalyqqa arnalǵan júk kólikteriniń barlyq bólshegi, ıaǵnı qańqasy, qozǵaltqyshy, elektrli jabdyqtary – bári-bárin arnaıy mamandarymyz qabyldap, qurastyrý jumystaryn bastaıdy. Bir jaqsysy, zaýyttaǵy jigitterdiń basym kópshiligi – ámbebap. Olar kólik qurastyrýshy da, elektrık te, dánekerleýshi de bola alady. Barlyǵy – 38 adam. Jalpy, mashına qurastyrý boıynsha zaýyt ishinde bes post bar. Ár postyń ózindik mindeti bolady. Biri – qańqadan bastap aldyńǵy jáne artqy kópirlerin jınap, júristik bóligin nyqtaıdy. Ekinshisinde pnevmatıkalyq jáne elektrli qurylǵylar, al úshinshi posta motor men qosalqy jabdyqtar ornatylady. Tórtinshisinde shanaq qoıylyp, oǵan qajetti zattyń barlyǵy bekitiledi», deıdi zaýyt dırektory Maksım Slomınskıı.
Onyń aıtýynsha, besinshi posta qurastyrylyp bolǵan kólikke qajetti suıyqtyqtar (motor maıy, tosol, dızel, t.b.) quıylyp, sońǵy tekseristen ótedi. Osylaısha, qajetti kólik ábden daıyn bolǵan soń zaýyt basshylyǵy tapsyrys berýshiniń qolyna kilt usynady. Aıtpaqshy, kásiporyn sehyn aralap júrgenimizde ózimiz «samosval» dep atap ketken aýyr júk kóligin kórdik. Eńgezerdeı ári qyp-qyzyl túske boıalǵan «ASTRA» dep atalatyn avtomashınanyń tek artqy júk tıegishi joq. Keıin bilgenimizdeı, onysy boıaý kamerasynda syrlanyp jatyr eken.
«ASTRA» da – ıtalııalyq marka. 30 tonnaǵa deıin júk tıeı alady. Kóbine-kóp ken qazý, qurylysta topyraq, tas tasý jumystaryna taptyrmas tehnıka. Qazir biz qurastyrǵan mundaı mashınalar elimizdiń birshama qurylys jáne geologııalyq kompanııasynda bar.
«Bul da Italııadan bólshek túrinde kelip, bizdiń kásiporynda tolyqtaı qurastyrylady. Tek artqy júk tıeıtin qoraby ǵana elimizde jasalady. Osy №1 ındýstrııalyq parkte birlesken áriptes seriktesimiz bar. Olar Temirtaýdaǵy zaýyttan alynǵan shıkizatty bólshek túrinde formaǵa keltirip, óńdep, bizge tabystasa, bizdiń jigitter ony dánekerlep, kólik kólemine saı júk tıegish qorap isteıdi. Odan keıin qajetti túske boıap, birden qurastyrylǵan júk kóliginiń ústine ornalastyramyz», deıdi zaýyttaǵy qurastyrý sehynyń basqarýshysy Mereı Bazarkeldi.
Zaýyt ónimderine tapsyrys elimizdiń ár óńirinen túsip jatady. Suranys kóshin Almaty bastap tur. Byltyr Jezqazǵannan da mol tapsyrys túsken.
«Biz kólikti tapsyrys berýshiniń usynysyna qaraı daıyndaımyz. Daıyn bolǵan soń, kólikti jetkizip, barlyq júıesin túsindirip beremiz. Sondaı-aq 30 tonnalyq aýyr júk kólikterinen bólek, «IVECO» markaly qoqys tasıtyn júk kólikteri de birkelki bolmaıdy. Kýbtyq eseppen ólshenip, 8-den 20 kýbqa deıingi ólshemdegi qoqys jınaıtyn avtomashınalar daıyndap kelemiz. Qar tazalaıtyn nemese jazdygúni sý shashyp, jol sypyratyn kólikterimiz de sondaı», deıdi Mereı.
Seh basqarýshysynyń aıtýynsha, mamandarǵa eń ońaıy «ASTRA» júk kóligin qurastyrý eken. «Tazalyqshy» kólikterdegideı kópfýnksııaly emes, barlyǵy júıeli ári tez jınalady.
Syrttan kelgen bólshekti qurastyrý jańalyq bolyp pa dersiz. Biraq sheteldik avtoónerkásiptegi tyń jańalyqty tosyrqamaı, sińirip, ony (brendtik tańbany) elge ákelip, ózimizdiń jigitterdiń bir qoldan naryqqa shyǵarýy – úlken eńbek.
