Áskerı qyzmetke bala kezinen qyzyǵýshylyǵy oıanǵan Altaı Farmanuly «Saptaǵy sarbaz ataný armanyma qanat bitirdi», deıdi. Osylaısha, merzimdi áskerı qyzmetke shaqyrylǵannan keıin eldiń tynyshtyǵy jolynda eńbek etip, ter tógýdi maqsat etken. Sodan beri aıdaýyldaý jónindegi atqyshtar rotasynda aǵa sarbaz-atqysh, bólimshe komandıri, vzvod serjanty qyzmetterin abyroımen oryndady. Al 2013 jyldan beri qaraýyl qyzmetiniń sapynda júr.
Merzimdi qyzmette júrip myqty komandırlerdiń aldyn kórgen ol qazir qaraýyl basshysy qyzmetin atqarady. Qoǵam tynyshtyǵy jolyndaǵy qaýippen jıi betpe-bet keletin qyzmette aldyńǵy býyn aǵalardyń siltegen joly, demeýi kásibı maman retinde sheshim qabyldaýǵa áli kúnge deıin kómegin tıgizetinin tilge tıek ete kelip: «Aıdaýylmen alyp júrýge arnalǵan atqyshtar rotasynyń basty maqsaty – qaraýyl qyzmetin qamtamasyz etý. Naqty aıtqanda, qarsy alý jáne sot qaraýyldaryna jaýaptymyz. Qarsy alý qaraýyly temirjol beketterinde atqarylsa, sot qaraýyly sot ǵımarattarynda júrgiziledi. Sot qaraýylynyń basty mindeti sol, aıyptalýshylardy sotqa aıdaýylmen jetkizý, olardyń qashýyna jol bermeý, sot úderisindegi tulǵalardyń qaýipsizdigine jaýap berýge tıispiz», deıdi. Onyń aıtýynsha, qoǵam qaýipsizdigin saqtaýdaǵy jaýapty sátte jaýyngerge qyraǵylyq kerek.
– Qyzmet barysynda ózime baǵynysty jeke quramnyń qyzmetine qyraǵy, muqııat bolýyna mán beremin. Sonymen qatar ár áskerı qyzmetshiniń óziniń ar-namysyn bıik ustap, aldyna qoıylǵan tapsyrmany ýaqtyly jáne sapaly oryndaýyn talap etemin. Oqys oqıǵa bola qalsa, jedel áreket etip, jyldam sheshim qabyldaý da basty qaperde ustaıtyn qaǵıdamyzǵa aınalýǵa tıis, – deıdi Altaı. – Al qaraýyl qyzmetine túsetin áskerı qyzmetshilerdiń moraldyq-psıhologııalyq jaı-kúıi odan da mańyzdy. О́ıtkeni adamnyń qajet kezde batyldyq tanytyp, jaýapkershilikti sezine bilýi úshin emosıonaldyq kóńil kúı óz babynda bolǵany jón. Sondyqtan sot qaraýylyna túsetin áskerı qyzmetshilerdiń moraldyq-psıhologııalyq jaı-kúıine erekshe yjdaǵattylyqpen qaraımyz. Qyzmetke shyǵar aldynda olardyń kóńil kúıi men densaýlyǵy tekseriledi. О́ıtkeni munyń bári jaýapty mindet atqarý kezinde áskerı qyzmetshige kedergi keltirmeýge tıis.
Sot úderisi kezinde ulandyq áskerı qyzmetshilerge óz áreketterine baǵa berýdi de úırenýge týra keledi. Bul – óte mańyzdy ereje. О́ıtkeni sot úderisinde áskerı qyzmetshiler sottalýshylardyń qashýyna jol bermeýge mindetti bolǵandyqtan, tártipti qadaǵalap, qatysýshylardyń qaýipsizdigine jaýap beredi. Sondaı-aq bir mezette sottalýshymen qarym-qatynas kezinde aıdaýyl qyzmetshiniń qaperde ustaýy kerek qaǵıdanyń biri – áskerı qyzmetshi jáne quqyq qorǵaý salasynyń ókili ekenińdi bir sát te umytpaý. Demek bul qyzmetten tys qarym-qatynasqa túspeı, antqa adaldyq tanytyp, mindetke minsiz bolýdyń mańyzdylyǵyna mán berýge shaqyrady. Sebebi áskerı qyzmetshi óz basynyń ar-namysyn joǵary ustaǵanda ǵana qaýipsizdikti saqtap, tártipke baǵyndyrýdyń jolyn taba biledi.
Jaýapty qyzmettiń jaýyngeri Altaı Jýhın otbasynyń aldyndaǵy jaýapkershiligin de umyt qaldyrǵan kezi joq. О́zi Qostanaı oblysynyń Amangeldi aýdanyna qarasty Qarasý aýylynda qarapaıym kópbalaly otbasynda dúnıege kelgen. Otbasy qundylyǵyn qaperinen shyǵarmaǵan ol búginde ómirlik serigimen birge bes bala tárbıelep otyr.
«Jaýyngerlik qyzmet otbasylyq ómirime eshqandaı kedergi keltirmeıdi. Bul úshin arnaıy demalys kúnderi belgilengen. Sondyqtan elim úshin saptaǵy sarbaz, otbasymda adal jar, úlgili áke bolýǵa barymdy salamyn», deıdi Altaı. Sebebi Otan otbasynan bastalady. Al otbasy tynysh bolsa, Otanyń da tynysh bolady dep sanaıtyn keıipkerimiz bos ýaqytyn otbasyna arnap, taza aýada serýendep, tabıǵat aıasynda demalǵandy jaqsy kóredi. Aıtýynsha, áskerı ómir ýaqyttyń baǵasyn uqtyryp, ár sátti maǵynaly ótkizýge tárbıeleıdi. Sportpen de turaqty shuǵyldanyp, qoly qalt etkende kitap oqýdy ádetine aınaldyrǵan sarbaz qoǵam tynyshtyǵyn saqtaýda árqashan qyraǵy.
