Sýretti túsirgen – Erlan OMAR, «EQ»
Jaqynda Máshhúr Júsiptiń jıyrma tomdyǵynyń birinen «Mahabbat týraly» dep jazylǵan rıýaıatty rısalaǵa kózim tústi. Aqyn ǵashyq-maǵshuq arasyndaǵy beısanaly baılanys jaıyn sóz etipti. Áýeli osy eki sózdiń ara-jigin ajyratyp alaıyq. Ǵashyq – túsinikti, yntyq, yntyzar jan. Al maǵushyq – álgi ǵashyq nazarynyń ıesi. Já, endi Máshekeńe sóz bereıik:
«Mahabbat oty áýeli maǵshuqqa túsedi. Sonan tutanyp, ǵashyqqa túsedi. Solaı bolǵany úshin sham ózi janady. Sonan soń párýanany kúıdiredi. Sham nege birinshi janady? «Meni kórip párýana keler me eken?» dep».
Apyraı, myna taǵylymnyń tamyry tym tereńde ǵoı. Baba sózin baıyptaıyq. Sonda súıiktińiz týraly ágarakı jaqsy oılasańyz, ol mindetti túrde ony sezedi eken jáne sizge de sondaı iltıpat kórsetedi. Biraq bul áreketiniń syryn ózi de uqpaýy múmkin.
Osydan barlyq adam arasyndaǵy qarym-qatynas qupııasy sheshilip sala beretindeı. Ishimiz jylı qoımaıtyn adamdy kóre qalsaq, onyń da sózi qatqyldaý, júzi sýyqtaý kórinetini sodan bolar. Biraq ol janmen til qatyp, aralasyp kórmeýimiz múmkin. Bar másele – oıda.
Kóńil terezesin árkim ózi tazartady. Bul – pendelik músinińnen kisilik kelbetiń qashalatyn rýhanı eńbek. Adamdar tek ózin kemeldendirýge kúsh jumsasa, aınalasy da soǵan saı jaqsara beredi. Ilgeridegi izgilerdiń nasıhaty osyǵan saıady.
«Gúldi oılasań – gúlstansyń, tikendi oılasań – tikendisiń».
Oıyma Rýmıdiń osy ǵaqlııasy orala berdi...
