Foto: caiu.edu.kz
Bul – 20 jastaǵy sportshynyń alǵashqy Olımpıadasy. Rýfına kanoe men baıdarkada eskek esý sportymen 13 jasynan beri aınalysady eken.
«Júzý sportynda júrgenimde bir kúni jattyqtyrýshym ashyq sýda eskek esip kórýdi usyndy. О́te qyzyq sport túri bolǵandyqtan, meni birden ózine baýrap aldy. Mine, sodan beri kanoe men baıdarkada eskek esip kelemin. Árıne, alǵashynda bári qıyn boldy. Biraq tájirıbeli bapkerlerimniń arqasynda bul sport túrin erkin meńgerip kettim. 2020 jylǵy Tokıo Olımpıadasyna qatysqan áriptesterimniń jarysyn teledıdar arqyly tamashalap otyryp, aldyma «kelesi Olıpıadaǵa men baramyn» degen maqsat qoıdym. Arada kóp ýaqyt ótpeı sol armanyma qol jetkizdim», deıdi jas sportshy.
Sportshy aǵaıyndy Sergeı jáne Tımofeı Emelıanovtarǵa eliktep ósip, úlgi tutqan.
«Rýfına Iskakova 2021 jyldan beri ulttyq qurama sapynda jattyǵyp keledi. Az ýaqyttyń ishinde úlken nátıje kórsetken talantty sportshylarymyzdyń biri. 2023 jyly Italııada jastar men jasóspirimder arasyndaǵy álem chempıonatynda top jaryp, el mereıin asyrdy. О́te minezdi, kez kelgen qıyndyqqa shydamdy. Sonyń arqasynda ol úlken jetistikterge qol jetkizip keledi», deıdi Ulttyq quramanyń bas bapkeri Qaısar Nurmaǵambetov.
«Sportshyǵa beriletin tapsyrma – Olımpııa oıyndaryna qatysyp, fınaldyq kezeńderge shyǵý jáne tájirıbe jınaý. Ári qaraı baǵy men babyna baılanysty bolmaq», dep atap ótti memlekettik jattyqtyrýshy Dáýlet Sultanbekov.
Rýfınanyń ózi Parıjge altyn úshin ǵana baratynyn aıtady.
«Olımpıada chempıony bolý – kez kelgen sportshynyń uly armany. Sondyqtan Parıjge altyn úshin baramyn. Olımpıadanyń júldesin jeńip alý úshin eńbektenip, jattyǵý jasap jatyrmyz. Sátin salsa, bul eńbegimiz aqtalady dep senemin», deıdi sportshy.
