Foto: «AMANAT» partııasy Astana qalalyq fılıalynyń baspasóz qyzmeti
Búgin «Sáken Seıfýllın atyndaǵy Qazaq agrotehnıkalyq zertteý ýnıversıteti» BPU, Saryarqa aýdany ákimdiginiń, «AMANAT»partııasy Astana fılıalynyń ókilderi, «Jastar Rýhy» jastar qanatynyń volonterleri men qoǵam qaıratkerleri qatarynan 400-ge jýyq adam Astana qalasyndaǵy aınalma joldyń aýmaǵynan 100 qaptan astam qoqys jınady.
«Biz búgin dalada nemese avtoturaqtar aýmaǵynda tastalǵan kóp qoqysty jınadyq. Tipti, bir adam munda qajetsiz zattar salynǵan paketterdi de tastap ketipti. Biz apta saıyn ótkizetin «Taza beısenbi» aksııasy tabıǵatymyzdy taza ustaýǵa uıytqy bolyp otyr. Osylaısha, partııa tek qoqys jınaýmen ǵana shektelmeıtin keshendi tazalyq is-sharasyn bastap berdi. Árbir ýchaskege máslıhat depýtattary, bastaýysh partııa uıymdarynyń belsendileri men jetekshileri bekitildi. Olar ondaǵy tazalyq pen tártiptiń saqtalýyna jaýap beredi», dedi «AMANAT» partııasy Astana qalalyq fılıalynyń atqarýshy hatshysy Muhammedjan Bolysbek.
Sondaı-aq «AMANAT» partııasynyń elordalyq fılıaly janynan qaladaǵy ekologııalyq jaǵdaıdy baqylaıtyn 5 mobıldi top quryldy. Ár mobıldi top quramynda ekologııalyq keńes múshesi, máslıhat depýtaty, aýdandyq partııa fılıaldarynyń tóraǵalary, aýdandyq atqarýshy hatshylar, partııalyq baqylaý komıssııasynyń músheleri, partııa belsendileri bar.
Buǵan deıin mobıldi toptar júrgizgen monıtorıng jumysy nátıjesinde qala aýmaǵynda jáne odan tysqary jerlerde 15 zańsyz qoqys orny anyqtalǵan edi.
Jalpy «Taza Qazaqstan» jalpyulttyq aksııasy aıasynda «AMANAT» partııasy 5 baǵyt boıynsha jumys bastady:
- Ekologııa salasyna qatysty zań shyǵarý;
- О́ńirlerde lastanǵan aýmaqtardyń kartasyn jasaı otyryp, «Taza beısenbi» ekologııalyq aksııasyn uıymdastyrý;
- «Astana-Almaty» tas jol boıyndaǵy aýmaqty tazartýǵa arnalǵan «Taza Qazaqstan» road-estafetasy;
- Tarıhı, mádenı jáne tabıǵı murany vandalızm áreketinen qorǵaýǵa arnalǵan qoǵamdyq naýqan;
- Jasyl volonterlik – ekologııalyq volonterler qozǵalysyn qurý.
Ekologııalyq máselelerdi sheshý – «AMANAT» partııasynyń saılaýaldy baǵdarlamasynda qamtylǵan mańyzdy basymdyqtyń biri. Saılaýaldy ýádelerdi júıeli júzege asyrý jumysy aıasynda byltyr memlekettik orman qory aýmaǵyna 302,7 mln túp aǵash egildi. Sonymen qatar 39 iri ónerkásiptik kásiporynda aýany lastaýyn baqylaıtyn avtomattandyrylǵan júıe ornatyldy.
