Belgili bolǵandaı, tańǵy ýaqytta 102 arnasyna joǵalǵan bala týraly habar kelip túsken. Qońyraý shalǵan balanyń anasy balasyn aýlada oınap júrgen jerinen taba almaı qalǵanyn aıtyp júgingen. Jaqyndary balany óz betimen izdep kórgenimen, izdeý nátıje bermegen.
Jedel qońyraý qabyldaǵan tártip saqshylary birden jyldam áreketke kóship, kámeletke tolmaǵan balany izdeýdi dereý uıymdastyrady. Qońyraý kelip túsken sátten quqyq qorǵaý qyzmetkerleri balanyń bolýy múmkin barlyq aýmaqty tekserýge kirisken. Bul jerde qyzmetshi ıtpen birge kınolog ınspektorlar da izdeý sharasyna judyryqtaı jumyldyrylǵan. Polıseılerdiń senimdi serigine aınalǵan qyzmettik ıt kıimnen shyqqan ıis arqyly joǵalǵan balany izdeýge kirisedi. Biraz ýaqyttan keıin Dan kıimge juqqan ıispen balanyń izine túsedi. Nátıjesinde, ıt polısııa qyzmetkerlerin bala júrgen úıdiń aýmaǵyndaǵy oıyn alańdarynyń birine aparǵan. Tártip saqshylaryna habarlasqan balanyń anasy kómek kórsetip, ulyn jedel izdestirgeni úshin polıseılerge erekshe alǵysyn bildirdi.
Nemis ovcharkasy Dan polısııa bólimshesiniń kınologııalyq qyzmetinde tórt jyldaı qyzmet etip keledi. Sodan beri qyzmettik ıt seriktesteriniń senimine ıe bolyp, baqylaý jumystaryna jaqsy úıretildi. Iis izine túsip joǵalǵandy izdeýge ábden daǵdylanǵan Dannyń qabiletine astanalyqtar da dán rıza. Elordalyq saqshylar aýlada eresekterdiń qaraýynsyz oınap júrgen balalardyń adasyp ketetin jaǵdaılar jıi bolatynyn aıtyp keledi. Buǵan deıin de qyzmettik ıt Dan turǵyn úıdiń aýlasynan shyǵyp ketken 5 jáne 7 jastaǵy eki ul balanyń da aman-esen jaqyndarymen qaýyshýyna sebepker bolǵan eken.
