Sýretti túsirgen – Jangeldi ÁBDIǴALYM
Jyl saıyn oqý jylynyń sońynda oblys ortalyǵyndaǵy 80-nen astam mektep oqýshysy arasynan úzdik anyqtalady. Talapqa saı, oqýda ozat bolýymen qatar ónerli, óreli, talantty, talapty bolýy shart.
Toqtar Ersinuly baıqaý barysyndaǵy birneshe kezeńnen súrinbeı, úzdik shyqqan. Esse jazýdan, sheshendik ónerden qatarlastarynyń aldy bolyp, basym upaımen oq boıy ozyq shyqty.
Baıqaýdy uıymdastyrǵandar Toqtardyń ártistik qabiletine erekshe kózderi túskenin, ónerge, onyń ishinde kıno jáne teatr salasyna degen qyzyǵýshylyǵyn aıryqsha atap aıtyp otyr.
Toqtarǵa bes kezeń boıy qoldaý kórsetken ustazy, synyp jetekshisi Elmıra Syzdyqova talantty shákirti Toqtardyń top jarǵanyna bek qýanyshty ekenin tolǵanyspen jetkizdi.
– «Jyl oqýshysy» saıysy kúzde bastalyp, jyl boıy jalǵasty. Oqýshylar bes týrdan ótti. Bilimi, talanty, qarym-qabileti, qyzyǵýshylyǵy jaǵynan synǵa tústi. Jalpy esepte Toqtar 497 upaımen alǵa shyqty. Qoǵamnyń bar salasynan habary bar talantty oqýshymnyń bilim kókjıegi óte keń. Kez kelgen pánge ıkemdi. Tarıh pen ádebıetti súıip oqıdy. Tańdaýy – teatr salasy. Al armany – kınorejısser bolý, – deıdi Elmıra Syzdyqova.
Oqyrmannyń esinde bolsa, jaqynda gazetimizge «Oqýshylardyń erekshe kúndeligi» degen ataýmen maqala jazyp, bilim salasyndaǵy basshylardyń tarapynan ulttyq kúndelikke qoldaý kórsetilse degenbiz. Kóp uzaǵan joq, qalalyq bilim bóliminiń ádiskerleri Toqtardyń muǵalimi Elmıra Syzdyqovanyń eńbegine, jobasyna jan-jaqty demeý kórsetip, qala mektepterine engizemiz degen jaqsy jańalyq aıtqan edi. Endi, mine, tól shákirti top jaryp jatyr.
Bala Toqtardyń bıikten kórinýi de tegin emes. О́ıtkeni esimi túbi bir túrki jurtynan shyqqan tuńǵysh ǵaryshker, Halyq qaharmany Toqtar Áýbákirovtiń qurmetine qoıylǵan. Bala Toqtardyń tusaýyn batyr Toqtar kesip, batasyn bergen.
Qaraǵandy oblysy
